Jambyl oblysynda jol sapasy tekserildi: ár besinshi synamadan aqaý tabyldy

TARAZ. KAZINFORM – Jambyl oblysynda bıyl jergilikti mańyzy bar avtojoldar men eldi meken kóshelerin jóndeýge 28 mlrd teńge bólindi. Bul týraly óńirdegi jolaýshylar kóligi jáne avtomobıl joldary basqarmasynyń basshysy Murat Saýryqov málimdedi.

Bólingen qarajat esebinen jalpy uzyndyǵy 464,5 shaqyrym jol qurylys, qaıta jańǵyrtý jáne ortasha jóndeý jumystarymen qamtylǵan. Onyń ishinde 62,1 shaqyrym – oblystyq, 48 shaqyrym – aýdandyq mańyzy bar joldar, al 330 shaqyrymnan astamy – eldi meken kósheleri.

– Bıyl 182 jobanyń 145-i aıaqtaldy, 48-inde jumystar jalǵasýda. Barlyq jobalardy 1 qarashaǵa deıin tolyq aıaqtaý kózdelip otyr, – dedi Saýryqov.

Onyń aıtýynsha, jol qozǵalysy qaýipsizdigin qamtamasyz etý maqsatynda 4 mlrd teńge aǵymdaǵy jóndeý men kútip ustaýǵa baǵyttalǵan. Sonymen qatar, jol sapasy «Jol aktıvteri sapa ortalyǵymen» birlesip tekserilýde. 248 ınspektsııalyq shyǵý barysynda 1079 synama alynyp, olardyń 21 paıyzynda sáıkessizdik anyqtalǵan.

– Sapasyz materıal qoldanǵan jáne kelisimshart talaptaryn buzǵan merdigerlerge 3,7 mln teńge aıyppul salyndy. Bir merdiger sot sheshimimen josyqsyz dep tanyldy, taǵy birnesheýine qatysty sot protsesi jalǵasýda, – dedi basqarma basshysy.

Aıta keteıik, Jambyl oblysynda medıtsınalyq uıymdar 32,3 mlrd teńgeni tıimsiz jumsaǵan.