Jambyl oblysynda jol erejesin buzýshylardy jasyryn baqylaý júıesi engizildi

TARAZ. KAZINFORM — Jambyl oblysynda jol qozǵalysy qaýipsizdigin arttyrý maqsatynda «Park-Raıt» atty 10 mobıldi jasyryn patrýldeý kesheni jumys isteýde. Bul týraly Polisia.kz saıty habarlady.

Atalǵan apparattyq-baǵdarlamalyq keshender oblys aýmaǵyndaǵy barlyq avtojoldarda qoldanylyp, jol erejesiniń buzylýyn avtomatty túrde tirkeıdi. Qurylǵylardyń ereksheligi — olardyń ornalasqan orny jasyryn bolady.

Polıtsııa departamentiniń málimetinshe, jyl basynan beri óńirde 1099 jol-kólik oqıǵasy tirkelip, 1669 adam túrli dene jaraqatyn alǵan. Jol apattarynyń basty sebepteriniń biri — jyldamdyqty asyrý.

Mobıldi baqylaý keshenderin qoldaný jol-kólik oqıǵalaryn, ásirese qozǵalysy tyǵyz aımaqtarda azaıtýǵa yqpal etedi dep kútilýde.

Polıtsııa barlyq júrgizýshilerge jyldamdyqty saqtaýǵa, qaýipsiz araqashyqtyq ustanýǵa jáne jolda muqııat bolýǵa shaqyrdy.

Aıta keteıik, Jambylda polıtsııadan qashqan júrgizýshi sholaq myltyqpen ustaldy.