Jambyl oblysynda jylqysyn poıyz qaqqan turǵyn 531 myń teńge ótemaqy tóleıdi
ASTANA. KAZINFORM – Jambyl oblysynda poıyzdyń jylqyny qaǵyp ketýinen keıin onyń ıesi 531 myń teńge kóleminde materıaldyq shyǵyndy óteýge mindetteldi, dep habarlaıdy Kazinform tilshisi.
Oqıǵa byltyr qarasha aıynda Otar – Shý temirjol ýchaskesinde bolǵan. Jolaýshylar poıyzy qozǵalyp kele jatqan kezde lokomotıvtiń aldyna kenetten jylqy shyǵyp ketken. Mashınıst dybystyq belgi berip, shuǵyl tejegishti qoldanǵanymen, soqtyǵysýdyń aldyn alý múmkin bolmaǵan.
Oqıǵadan keıin elektrovoz qalpyna keltirý jóndeýine jiberildi. Temirjol kompanııasy keltirilgen shyǵyndy 531 myń teńgege baǵalady.
Tekserý barysynda mamandar jylqynyń ıesin anyqtady. Belgili bolǵandaı, ol buǵan deıin de temirjol mańynda mal jaıý qaǵıdalaryn buzǵany úshin ákimshilik jaýapkershilikke tartylǵan.
Temirjol kompanııasy Shý aýdandyq sotyna lokomotıvti jóndeýge ketken shyǵyndy óndirý týraly talap aryz berdi. Іs materıaldaryn zerdelegen sot keltirilgen zalal mal ıesiniń jaıý qaǵıdalaryn saqtamaýy saldarynan bolǵan degen qorytyndyǵa keldi.
Sot sheshimimen jylqy ıesinen 531 myń teńge materıaldyq shyǵyn, sondaı-aq memlekettik baj salyǵyn tóleýge jumsalǵan shyǵyn óndirildi.
Sot sheshimi ázirge zańdy kúshine engen joq.
Eske salaıyq, buǵan deıin Aqmola oblysynda júk poıyzy jaıylyp júrgen 7 jylqyny qaǵyp ketkeni habarlandy.
