Jambyl oblysynda jyl basynan beri 2000-nan astam jasóspirim polıtsııaǵa jetkizilgen
TARAZ. KAZINFORM – Jyl basynan beri Jambyl oblysynda 2000-nan astam jasóspirim polıtsııaǵa jetkizildi. Kámeletke tolmaǵandarǵa qatysty barlyǵy 2591 ákimshilik is qozǵalǵan, dep habarlaıdy Kazinform tilshisi.
Jambyl oblysy polıtsııa departamenti qoǵamdyq qaýipsizdik basqarmasy bastyǵynyń orynbasary Álisher Qalyshev óńirde jasóspirimder arasyndaǵy quqyqbuzýshylyqtyń aldyn alý boıynsha júıeli jumystar júrgizilip jatqanyn aıtty.
Onyń aıtýynsha, polıtsııanyń, pedagogterdiń jáne prokýratýra ókilderiniń qatysýymen 868 reıd uıymdastyrylǵan. Nátıjesinde 464 jasóspirim jáne 292 turmysy nashar otbasy esepke alynǵan. Taǵy 62 otbasy áleýmettik qaýipti jaǵdaıda dep tanylǵan.
Devıantty minez-qulqyna baılanysty toǵyz jasóspirim jabyq tıptegi arnaıy mektepterge jiberilgen. Sonymen qatar 15 adam ata-ana quqyǵynan aıyrylǵan nemese shektelgen.
Balalardy tárbıeleý mindetterin tıisinshe oryndamaǵany úshin 211 ata-ana jaýapkershilikke tartylǵan.
Budan bólek, kámeletke tolmaǵandardyń túngi ýaqytta úıden tys júrýine erekshe nazar aýdarylyp otyr. Mundaı quqyqbuzýshylyqtar úshin 1719 ata-ana jaýapqa tartylǵan.
Polıtsııa ókilderi kórsetkishterdiń tómendeýine qaramastan, profılaktıkalyq jumystardy kúsheıtý jalǵasatynyn atap ótti.
— Bizdiń mindet — quqyqbuzýshylyqtarǵa tek áreket etý ǵana emes, olardyń aldyn alý. Bul jumysqa mektepterdi, ata-analardy jáne qoǵamdy keńinen tartý qajet, — dedi departament ókili.
Sonymen qatar Álisher Qalyshevtiń aıtýynsha, bıylǵy jyldyń alǵashqy eki aıynda kámeletke tolmaǵandarǵa qarsy qylmystar sany tórtten birine azaıyp, 38-den 28 jaǵdaıǵa deıin tómendegen.
Polıtsııa málimetinshe, jynystyq qolsuǵýshylyqqa qatysty qylmystar da 60 paıyzǵa azaıǵan. Eger ótken eseptik kezeńde mundaı 15 quqyqbuzýshylyq tirkelse, 2026 jyldyń qańtar–aqpan aılarynda alty derek anyqtalǵan.
— Degenmen mundaı qylmystar eń kúrdeli sanattardyń biri bolyp qala beredi, sebebi olar kóbinese otbasy ishinde nemese jaqyn ortada jasalady, — dep atap ótti Á.Qalyshev.
Jyl basynan beri eki zorlaý faktisi boıynsha, seksýaldyq sıpattaǵy bir zorlyq áreketi boıynsha jáne 16 jasqa tolmaǵan adammen jynystyq qatynasqa túsý baby boıynsha úsh qylmystyq is qozǵalǵan.
Aıta keteıik, Jambyl oblysynda eki aıda 27 jasóspirim júktiligi tirkelgenin jazdyq.
