Jambyl oblysynda jyl basynan beri 2 756 zańsyz mıgrant ustaldy
TARAZ. KAZINFORM – Jyl basynan beri Jambyl oblysynda 2 756 zańsyz mıgrant anyqtalyp, barlyǵy ákimshilik jaýapkershilikke tartyldy. Olardyń 648-i Qazaqstannan shyǵaryldy, negizinen Ózbekstan, Tájikstan jáne Túrikmenstanǵa jóneltildi.
Oblystyq polıtsııa departamentiniń málimetinshe, sheteldikterdiń elde bolý erejesin saqtaýy úshin qabyldaýshy tarap jaýap beredi. Osyǵan baılanysty mıgranttardyń ýaqytyly shyǵýyn qamtamasyz etpegen 407 Qazaqstan azamaty ákimshilik jaýapkershilikke tartylǵan.
Budan bólek, tirkelmegen sheteldik jumys kúshin paıdalanǵany úshin 102 adamǵa aıyppul salynǵan.
– 2025 jyldyń jeti aıynda kóshi-qon zańnamasyn buzǵany úshin jalpy somasy 65,6 mln teńge aıyppul salyndy. Sonymen qatar QR Qylmystyq kodeksiniń 392-baby (memlekettik shekarany zańsyz kesip ótý) boıynsha 3 qylmystyq is, 394-baby (zańsyz kóshi-qondy uıymdastyrý) boıynsha 8 qylmystyq is qozǵaldy, – dedi Jambyl oblysy PD kóshi-qon qyzmeti basqarmasy bastyǵynyń m.a. Araı Aıymbet.
Aıta keteıik, deportatsııalanǵan ózbekstandyq mıgranttar elge qaıtý shyǵynyn óteýge mindetteledi.