Jambyl oblysynda jer ýchaskeleri óz qunynan úsh ese qymbatqa satyldy
ASTANA. KAZINFORM — Jambyl oblysynda 2026 jyldyń alǵashqy jartyjyldyǵynda jer ýchaskelerin satý boıynsha 33 elektrondy aýktsıon ótkizildi. Saýdaǵa shyǵarylǵan ýchaskelerdiń bastapqy baǵasy 78,2 mln teńge bolsa, elektrondy saýda qorytyndysynda satyp alýshylar olar úshin 267,3 mln teńge tólegen.
Oblystyq jer qatynastary basqarmasynyń málimetinshe, satylǵan jer ýchaskeleriniń jalpy aýmaǵy 38 gektardy qurady. Olardyń kadastrlyq quny 78,2 mln teńge dep baǵalanǵanymen, aýktsıon qorytyndysynda jalpy 267,3 mln teńgege satylǵan.
Basqarmada mundaı baǵa aıyrmashylyǵy jerdi satý tártibimen túsindirildi. Eger jer ýchaskesi memleket menshiginde bolyp, áli eshkimniń paıdalanýyna berilmegen bolsa, oǵan quqyq tek aýktsıon arqyly beriledi. Bul talap Qazaqstan Respýblıkasy Jer kodeksiniń 48-babynda kózdelgen. Mundaı jaǵdaıda kadastrlyq qun bastapqy baǵa retinde belgilenedi, al túpkilikti qun aýktsıon barysynda qalyptasady.
Basqarma basshysy Danııar Ótepovtiń aıtýynsha, bıylǵy alty aıda vedomstvoǵa memlekettik qyzmet kórsetý salasy boıynsha 48 ótinish túsken.
Olardyń barlyǵy oń sheshimin tapqan. Onyń ishinde 18 jaǵdaıda jer ýchaskelerin qalyptastyrýǵa arnalǵan jerge ornalastyrý jobalary bekitilse, 30 jaǵdaıda memlekettik menshiktegi jer ýchaskelerine quqyqtar aýktsıon ótkizilmeı berilgen.
Aıta keteıik, Jambyl oblysynda bıyl memleket menshigine 47 536,43 gektar aýyl sharýashylyǵy jeri qaıtaryldy.
