Jambyl oblysynda jer silkinisiniń saldaryn baǵalaý jónindegi úkimettik toptyń jumysy jalǵasýda
ASTANA. KAZINFORM – Tótenshe jaǵdaılar vıtse-mınıstri Kegen Tursynbaev bastaǵan úkimettik jumys toby Jambyl oblysynda jumysyn jalǵastyryp jatyr. Ekinshi kúni mamandar zardap shekken aýdandarǵa, ıaǵnı Merki jáne T.Rysqulov atyndaǵy aýdanǵa tekserý júrgizip, arnaıy komıssııalardyń esepterin tyńdady.
Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov turǵyn úıler men basqa da ǵımarattardyń zaqymdaný dárejesi týraly málimetterdi usyndy.
TJM Seısmologııalyq baqylaý jáne zertteý ulttyq ǵylymı ortalyǵynyń dırektory Dáýlet Sársenbaev óńirde ornatylǵan seısmologııalyq stantsııalar men datchıkterdiń jumysy týraly baıandady. Olar jer asty dúmpýlerin tirkep, seısmıkalyq belsendilikti taldaýǵa kómektesedi, bul táýekelderdi ýaqtyly baǵalaýǵa múmkindik beredi.
— Qazirgi ýaqytta jaǵdaı turaqty, tirshilikti qamtamasyz etý júıeleri shtattyq rejımde jumys istep jatyr. Mamandar zalaldy baǵalaýdy jalǵastyrýda jáne turǵyndardyń qaýipsizdigin qamtamasyz etý úshin qajetti sharalardy qabyldap jatyr, — delingen TJM habarlamasynda.
Aıta ketelik Úkimettik jumys toby Jambyl oblysynda jer silkinisinen zaqymdanǵan nysandardy aralady.
Eske sala keteıik, buǵan deıin Almatydan 323 shaqyrym jerde jer silkinisi tirkelgenin jazǵan bolatynbyz. Eseptelgen qarqyndylyǵy Merki aýylynda — 5.0 ball, Qulan aýylynda — 4.0 ball, Shý qalasynda — 2.0 ball shamasynda bolǵan.
Buǵan deıin habarlanǵandaı, seısmıkalyq ahýaldy baqylaý jónindegi jedel shtab 24/7 tártibinde jumys istep jatyr.