Jambyl oblysynda jedel járdem kólikteri qarǵa batyp qalyp jatyr
ASTANA. KAZINFORM — Jambyl oblysynda qalyń qar men aýa raıynyń qolaısyzdyǵyna qaramastan, oblystyq jedel járdem brıgadalary turǵyndarǵa medıtsınalyq kómekti úzdiksiz kórsetip jatyr, dep habarlaıdy DSM baspasóz qyzmeti.
Aq ulpa qar jol qozǵalysyn qıyndatyp, keıbir eldi mekenderde kólik qatynasyn shektegenine qaramastan, medıtsına qyzmetkerleri óz mindetterin jaýapkershilikpen atqaryp keledi.
Jýaly aýdany B.Momyshuly aýylynda jedel medıtsınalyq járdem stantsııasynyń brıgadasy shaqyrtý boıynsha naýqasqa kómek kórsetip qaıtar jolda qalyń qarǵa batyp qalǵan. Arnaıy tehnıkanyń kómeginsiz qozǵalý múmkin bolmaǵan. Jedel jaǵdaı týraly habar aýdandyq ákimdikke jetkizilip, qysqa merzim ishinde arnaıy tehnıka jumyldyryldy. Ákimdiktiń traktory qar qursaýynda qalǵan jedel járdem kóligin shyǵaryp, brıgadanyń qaýipsiz túrde qyzmetin jalǵastyrýyna múmkindik jasady.
— Qazirgi tańda óńirde qar tazalaý jumystary kúsheıtilgen rejımde júrgizilip jatyr. Al jedel járdem qyzmeti qandaı jaǵdaı bolmasyn turǵyndardyń ómiri men densaýlyǵyn qorǵaý jolynda táýlik boıy jumysyn jalǵastyrady, — delingen habarlamada.
Osyǵan deıin Jambyl oblysynda qutqarýshylar qar qursaýynda qalǵan 15 kólikti shyǵarǵanyn jazǵanbyz.