Jambyl oblysynda jasóspirimderge qatysty 180-nen astam zań buzýshylyq anyqtaldy
ASTANA. KAZINFORM — Jambyl oblysynda túngi ýaqytta júrgizilgen reıd kezinde polıtseıler 182 ákimshilik quqyqbuzýshylyqty anyqtady. Olardyń basym bóligi — túnde ata-anasynyń qadaǵalaýynsyz kóshede júrgen jasóspirimder, dep habarlaıdy Polisia.kz.
Qarashanyń 9-10 kúnderi ótken túngi reıdte polıtsııa qyzmetkerleri oblys aýmaǵyndaǵy oıyn-saýyq oryndaryn, kósheler men qoǵamdyq oryndardy tekserdi. Negizgi maqsat — jasóspirimder arasyndaǵy quqyq buzýshylyqtyń aldyn alyp, balalardyń qaýipsizdigin qamtamasyz etý.
Reıd barysynda 146 jasóspirimniń túngi ýaqytta zańdy ókilderinsiz júrgeni belgili boldy. Budan bólek, ata-analardyń bala tárbıesine qatysty mindetterin oryndamaýynyń 25 deregi, oıyn-saýyq oryndaryna kámeletke tolmaǵandardy kirgizýdiń 6 deregi jáne jasóspirimder jasaǵan usaq buzaqylyqtyń 5 deregi tirkeldi.
Tekserý kezinde Taraz qalasyndaǵy oıyn-saýyq oryndarynyń birinen túngi saǵat 04:30 shamasynda kámeletke tolmaǵan jasóspirim anyqtaldy. Osyǵan baılanysty mekeme ıesine qatysty ákimshilik hattama toltyryldy.
— Árbir ata-ana balasynyń qaıda júrgenin, kimmen aralasatynyn jáne bos ýaqytyn qalaı ótkizetinin baqylaýda ustaýy qajet. Keshki saǵat 22.00-den úıde balańyz bolmasa, dabyl qaǵyńyz, izdeńiz, qadaǵalańyz. Sizdiń baqylaýyńyz — balańyzdy qaýipten saqtap qalýy múmkin, — dep atap ótti Jambyl oblysy PD bastyǵynyń orynbasary Aset Ospanov.
Aıta keteıik, aımaqtaǵy úsh jasóspirimniń ólimine qatysty is sotqa joldandy.
