Jambyl oblysynda jasóspirim ózine qol jumsady: is sotqa jiberildi

TARAZ. KAZINFORM - Sottalýshy qatarynda eresek jigit pen eki kámeletke tolmaǵan jasóspirim bolyp otyr, dep habarlaıdy Kazinform agenttiginiń tilshisi.

29 sáýirde Jambyl aýdany Tastóbe aýylynda 15 jastaǵy jasóspirim qaıǵyly jaǵdaıda qaıtys boldy. Osyǵan qatysty QR Qylmystyq kodeksiniń 105-baby boıynsha ózin-ózi óltirýge ıtermeleý deregi boıynsha qylmystyq is qozǵaldy. Tergeý tórt aıdan astam ýaqytqa sozylyp, 5 qyrkúıekte úsh kúdiktige qatysty materıaldar sotqa jiberildi.

– Jasóspirim qaıtys bolǵan kúni protsessýaldyq prokýror taǵaıyndaldy. 23 jastaǵy aýyl turǵyny ózin-ózi óltirýge ıtermelegeni úshin kináli dep tanylyp, Jambyl aýdandyq soty ony eki aıǵa qamaýǵa alý týraly sheshim shyǵardy. Sonymen qatar 10-shy jáne 11-synyptyń eki oqýshysy qylmysqa kómekteskeni úshin aıypty dep tanyldy, - delingen habarlamada.

Qaıtys bolǵan jasóspirimge joǵary synyptaǵylar qysym jasaǵany belgili boldy. Tipti sottalýshylardyń biri mektep oqýshylaryn ózine úı salyp berýge májbúrlegen.

Muǵalimder de, aýyldyń eresek adamdary da, polıtseıler de bolyp jatqan jaǵdaıǵa nazar aýdarmaǵan. Bul bir jasóspirimniń ómirin qıdy. Endi úsh kúdikti temir tordyń ar jaǵynda bes jylǵa deıin otyrýy múmkin.

Tarazda 14 jastaǵy mektep oqýshysy ózine qol jumsaǵanyn jazǵan edik.