Jambyl oblysynda jas sportshylardyń jappaı ýlanýyna sút sebep bolǵan
ASTANA. KAZINFORM – Jambyl oblysynyń Merki aýdanynda qańtar aıynda bolǵan jas sportshylardyń jappaı ýlanýyna úı jaǵdaıynda óndirilgen sút pen aıran sebep bolǵany anyqtaldy. Bul týraly sanıtarııalyq dárigerler júrgizgen epıdemıologııalyq tekserý qorytyndysynda aıtylǵan.
21 qańtar kúni keshke «Turan» demalys aımaǵynan Qyzylorda oblysynan kelgen jas balýandar Merki aýdandyq aýrýhanasyna jetkizilgen. Jasy 12 men 17 aralyǵyndaǵy sportshylar óńirde oqý-jattyǵý jıynynda bolǵan. Alǵashynda olarǵa «anyqtalmaǵan sebepten bolǵan gastroenterıt» dıagnozy qoıylǵan.
Oqıǵadan keıin mamandar naýqastardan jáne sportshylarǵa berilgen taǵamdardan zerthanalyq synamalar alǵan. Sanıtarııalyq-epıdemıologııalyq tekserý nátıjesinde zardap shekkenderge stafılokokkty enterıt dıagnozy qoıyldy.
Tekserý barysynda Staphylococcus aureus bakterııasynyń kózi úı jaǵdaıynda daıyndalǵan sút pen aırandy jetkizýshiden anyqtalǵan. Jalpy vırýstan 21 adam, onyń ishinde 14 jasqa deıingi 13 bala zardap shekken.
Nysandy jospardan tys tekserý kezinde kóptegen sanıtarııalyq talaptyń buzylǵany belgili boldy. Atap aıtqanda, nysannyń sanıtarııalyq-epıdemıologııalyq qorytyndysy bolmaǵan. Sondaı-aq qyzmetkerler mindetti medıtsınalyq tekserýden jáne gıgıenalyq oqytýdan ótpegen.
Mamandar azyq-túlikti daıyndaý men saqtaý talaptarynyń da óreskel buzylǵanyn anyqtady. Tońazytqyshta shıki etpen birge pisken jylqy eti men qazy saqtalǵan. Qoımada un, kókónis jáne ózge de azyq-túlik edende turǵan. Temperatýralyq jáne ylǵaldylyq rejımi arnaıy ólsheý quraldarynyń joqtyǵynan baqylanbaǵan.
Burshaq, jasymyq, makaron, dámdeýishter, sary maı, shaı jáne nan ónimderiniń sapasy men qaýipsizdigin rastaıtyn qujattar usynylmaǵan. Sondaı-aq sıyr eti, sazan jáne kókserkege qatysty veterınarııalyq-sanıtarııalyq saraptama qorytyndylary bolmaǵan.
Budan bólek, mekemede taǵam daıyndaýdyń tehnologııalyq kartalary men óndiristik baqylaý baǵdarlamasy bolmaǵan. Azyq-túlik kesýge arnalǵan quraldar tańbalanbaǵan ári maqsatyna saı paıdalanylmaǵan. Qyzmetkerler kún saıyn juqpaly jáne teri aýrýlarynyń belgilerine tekserilmegen.
Sanıtarııalyq-epıdemıologııalyq baqylaý departamentiniń málimetinshe, nysannyń qyzmetine tyıym salynyp, 10 qyzmetker jumystan shettetilgen. Alaıda shekteýdiń naqty merzimi men qandaı qyzmet túriniń toqtatylǵany naqtylanbady. Sonymen qatar demalys aımaǵynyń áleýmettik jelidegi paraqshasyna qaraǵanda, nysan qazirgi ýaqytta jumysyn jalǵastyryp jatyr.
Jedel den qoıý sharalaryn oryndamaǵany úshin jeke kásipkerge 302 750 teńge aıyppul salyndy. Al Merki aýdandyq soty sanıtarııalyq-epıdemıologııalyq talaptardy buzǵany úshin qosymsha 484 400 teńge aıyppul taǵaıyndady.
Osylaısha, salynǵan aıyppuldyń jalpy kólemi 787 150 teńgeni qurady.
Aıta keteıik, osyǵan deıin ákimdik Merkidegi balalardyń jappaı ýlaný faktisine qatysty túsinikteme bergen bolatyn.
