Jambyl oblysynda zeınetaqy qarajatyn rásimdep beremin degen alaıaq sottaldy

ASTANA. KAZINFORM — Kásipqoı alaıaqqa senip qalǵan áıel onyń shyn máninde joq qyzmetteri úshin birneshe aı boıy aqsha tólep kelgen. Tek keıin ǵana óziniń qaqpanǵa túskenin túsingen, dep habarlaıdy Kazinform tilshisi.

Ótken jyldyń tamyz aıynan qarasha aıyna deıin alaıaq Moıynqum aýdanynyń turǵynynyń senimine kirip alǵan. Ol áıeldiń álsiz tusyn, naqtyraq aıtqanda, aýyl turǵynynyń zeınetaqy jınaqtaryn paıdalanýǵa degen nıetin baıqap, osy kúrdeli máselede «júz paıyz kómek kórsetýdi» usynǵan.

Áıeldiń qarajatty alý tártibiniń zańdyq qyr-syryn múlde bilmeıtinin paıdalanǵan alaıaq odan júıeli túrde aqsha alýdy bastaǵan.

Ártúrli anyqtamalarǵa, komıssııalarǵa jáne óz qyzmetine aqy tóleý syltaýymen ol áıeldi óziniń esepshotyna turaqty túrde aqsha aýdarýǵa kóndirip otyrǵan. Nátıjesinde birneshe aıdyń ishinde jalǵan kómekshi 4,8 mıllıon teńgeden astam qarjyǵa ıe bolǵan.

Árıne, áıel eshqandaı zeınetaqy tólemin ala almaǵan, al alynǵan barlyq qarajatty alaıaq jeke qajetine jumsap jibergen. Alaıaqtyq áshkerelengen soń is sotqa jetken. Er adamǵa iri kólemdegi alaıaqtyq boıynsha aıyp taǵylǵan.

Sot aldynda ol taktıkasyn kúrt ózgertip, kinásin tolyq moıyndaǵan. Sondaı-aq shyn júrekten ókinetinin kórsetip, ózin túrmege qamaýdy suramaýdy ótingen. Memlekettik aıyptaýshy istiń mán-jaıyn eskere otyryp, bas bostandyǵynan aıyrýmen baılanysty emes jaza taǵaıyndaýdy surady. Alaıda bul protsestegi eń tańǵalarlyq jaıt — jábirlenýshiniń ustanymy boldy.

Alaıaq keltirgen orasan shyǵyndy tolyq ótep úlgermese de, áıel ózine zııan keltirgen adammen tatýlasqanyn aıtyp, ony bostandyqta qaldyrýdy suraǵan. Sot sheshim shyǵarý kezinde sottalýshynyń shyn nıetpen kinásin moıyndaýyn jeńildetetin mán-jaı retinde eskerdi. Іste aýyrlatatyn faktorlar anyqtalmady.

Prokýrordyń ustanymy men jábirlenýshi taraptyń keshirimin eskere otyryp, sot er adamdy kináli dep tanydy, alaıda ony bas bostandyǵynan aıyrmady. Oǵan 3,5 jyl merzimge bas bostandyǵyn shekteý jazasy taǵaıyndaldy.

Endi jeńil jolmen aqsha tabýdy kózdegen azamat qatań probatsııalyq baqylaýda bolady.

Aıta keteıik, Qazaqstanda ınternet-alaıaqtyqtan kelgen shyǵyn 4,8 mlrd teńgege jetken.