Jambyl oblysynda zańsyz jumystan bosatylǵan muǵalim qyzmetine qaıta oraldy
TARAZ. KAZINFORM – Jambyl oblysy Jýaly aýdanynda zeınet jasyna jetken muǵalimdi zańsyz jumystan bosatý faktisi boıynsha sot sheshimi shyqty.
1991 jyldan beri orta mektepte uzartylǵan kún tárbıeshisi, keıin tarıh pániniń muǵalimi bolyp jumys istegen turǵyn 2024 jyldyń jeltoqsan aıynda zeınetkerlik jasqa jetken. Ol oqý jylynyń sońyna deıin jumysyn jalǵastyrýǵa nıet bildirip, mektep dırektorynyń atyna aryz jazǵanymen, ótinishi eskerilmeı, zeınetkerlik jasqa tolýyna baılanysty jumystan bosatylǵan.
- Muǵalim bul buıryqqa qatysty sotqa shaǵymdanyp, qyzmetin qaıta qalpyna keltirýdi, májbúrli túrde jumysqa shyqpaǵan kezeńdegi jalaqysyn jáne moraldyq shyǵyndy óndirip berýdi suraǵan.
Sot materıaldaryn zertteý nátıjesinde mektep ákimshiliginiń áreketi Eńbek kodeksi, ujymdyq shart jáne salalyq kelisim normalaryn óreskel buzǵany anyqtaldy. Jumys berýshi eńbek shartyn buzý týraly habarlamany zańda kórsetilgen merzimde bermegen jáne qyzmetkerdiń quqyqtaryn saqtamaǵan, - dep jazylǵan aqparatta.
Jýaly aýdandyq soty muǵalimniń qyzmetin qaıta qalpyna keltirip, 2024 jyldyń jeltoqsanynan 2025 jyldyń mamyr aıyna deıingi májbúrli jumystan bos kezeńi úshin 2,1 mln teńge jalaqy, 100 myń teńge moraldyq ótemaqy jáne 250 myń teńge ókil qyzmetine aqy óndirip berdi.
Anyqtalǵan zańbuzýshylyqtarǵa baılanysty sot aýdan ákimdiginiń bilim bólimine jeke uıǵarym joldap, mundaı jaǵdaıdyń qaıtalanýyna jol bermeý sharalaryn qabyldaýdy tapsyrdy.
Mektep dırektorynyń shaǵymyn Jambyl oblystyq soty qanaǵattandyrmaı, birinshi satydaǵy sot sheshimin ózgerissiz qaldyrdy. Sot aktileri zańdy kúshine endi.
Aıta keteıik, Oqý-aǵartý mınıstri Jambyl oblysynda quldyqqa túsken balalarǵa qatysty pikir bildirdi.