Jambyl oblysynda zańsyz kóshi-qon arnasy anyqtaldy
ASTANA. KAZINFORM – Jambyl oblysynda mal jaıǵan bolyp júrip, shetel azamattaryn memlekettik shekara arqyly zańsyz ótkizýmen aınalysqan qylmystyq top ustaldy, dep habarlaıdy Kazinform agenttiginiń tilshisi.
Kúdiktilerdi ustaý boıynsha arnaıy operatsııa oblys prokýratýrasynyń úılestirýimen polıtsııa jáne shekara qyzmetiniń birlesken kúshimen júrgizildi. Qolǵa túskender – Almaty oblysy men Jambyl oblysy, Merki aýdanynyń turǵyndary.
Quqyq qorǵaý organdarynyń málimetinshe, top músheleri aldyn ala sóz baılasyp áreket etken. Olar óriste «mal jaıyp» júrip, shetel azamattaryn memlekettik shekara arqyly zańsyz ótkizý arnasyn uıymdastyrǵan.
Tintý barysynda kúdiktilerden zattaı dáleldemeler tárkilendi. Atap aıtqanda, shetel azamattarynyń fotosýretteri men tólqujattary, uıaly telefondar, bank kartalary, sondaı-aq 1 mıllıon teńgeden astam qolma-qol aqsha alynǵan.
Sonymen qatar kúdikti retinde Qazaqstan Respýblıkasynyń memlekettik shekarasyn zańsyz kesip ótýge járdem kórsetken kórshi memlekettiń azamattary da anyqtaldy. Atalǵan derek boıynsha QR Qylmystyq kodeksiniń 394-baby 2-bóligine sáıkes (zańsyz kóshi-qondy uıymdastyrý) sotqa deıingi tergep-tekserý bastaldy.
Kúdiktiler ýaqytsha ustaý ızolıatoryna qamaldy. Olarǵa 3 jyldan 7 jylǵa deıin bas bostandyǵynan aıyrý jazasy kesilýi múmkin. Qazirgi ýaqytta tergeý amaldary jalǵasyp jatyr.
Eske sala ketsek, Jambyl oblysynda shekaradan 30 keli esirtki alyp ótpek bolǵan sheteldiktiń ustalǵanyn jazdyq.