Jambyl oblysynda zańsyz qarý saqtaǵan eki baqtashyǵa aıyppul salyndy
ASTANA. KAZINFORM – Jambyl oblysynda mal jaıylymyndaǵy qystaqtarda tirkelmegen ańshylyq qarýyn zańsyz saqtaǵan eki baqtashy ákimshilik jaýapkershilikke tartyldy.
Jýaly aýdandyq soty 2026 jyldyń mamyr jáne maýsym aılarynda polıtsııa júrgizgen tekserýlerden keıin qozǵalǵan eki ákimshilik isti qarady.
Tekserý barysynda tártip saqshylary qystaqtardan tirkelmegen 12 kalıbrli «TOZ-B» jáne «IJ-18» tegis uńǵyly ańshylyq myltyqtaryn tapqan. Qarý ıelerinde olardy saqtaýǵa ruqsat beretin qujattar bolmaǵan.
Sot otyrysynda eki baqtashy da kinásin moıyndady. Olardyń biri myltyqty mal baǵyp júrgen kezde daladan taýyp alǵanyn aıtqan.
– Qarýdy zańsyz saqtaý deregi polıtsııa qyzmetkerleriniń hattamalary, qyzmettik baıanattary, tárkilengen qarý jáne saraptama qorytyndylary arqyly dáleldendi, – delingen sot materıaldarynda.
Ákimshilik quqyq buzýshylyq týraly kodekstiń 482-baby 1-bóligine sáıkes, zańsyz qarý saqtaǵany úshin 20 aılyq eseptik kórsetkish mólsherinde aıyppul salynyp, qarý tárkilenedi.
– Sot sheshimimen turǵyndardyń birine 86 500 teńge aıyppul salyndy. Ekinshi quqyq buzýshynyń materıaldyq jaǵdaıy men jaýapkershilikti aýyrlatatyn mán-jaılardyń bolmaýy eskerilip, aıyppul mólsheri 30 paıyzǵa azaıtylyp, 60 550 teńge bolyp belgilendi, – dep habarlady sot.
Eki sot qaýlysy da zańdy kúshine endi.
Aıta keteıik, Túrkistan oblysynda qarýdy saqtaý talabyn buzǵan 700-ge jýyq azamat jaýapqa tartyldy.
