Jambyl oblysynda zańsyz ańshylyqtan kelgen zalal 92 mln teńgeden asty
ASTANA. KAZINFORM — 2025 jyldyń qorytyndysy boıynsha Jambyl oblysynda zańsyz ań aýlaý saldarynan tabıǵatqa keltirilgen shyǵyn 92 mln teńgeden asty, dep habarlaıdy Kazinform agenttiginiń tilshisi.
Tabıǵı resýrstar basqarmasynyń málimetinshe, jyl boıy memlekettik orman qory aýmaqtarynda jáne rezervtegi ańshylyq alqaptarda 1073 reıdtik is-shara ótkizilgen. Nátıjesinde orman zańnamasyn, ańshylyq jáne balyq aýlaý qaǵıdalaryn buzǵany úshin 682 ákimshilik hattama toltyryldy. Salynǵan aıyppuldardyń jalpy somasy 11 mln teńgeden asty.
Sonymen qatar 2025 jyly ańshylyq zańnamasyn óreskel buzý derekteri boıynsha segiz qylmystyq is tirkeldi. Zańsyz aýlanǵan janýarlardyń qatarynda arqar, qaraquıryq, elik jáne jabaıy qabandar bar. Keıbir jaǵdaılar erekshe qorǵalatyn tabıǵı aýmaqtarda anyqtalyp, ekologııalyq zalaldyń asa iri kólemde bolýyna ákep soqqan.
Salystyrmaly túrde alǵanda, 2024 jyly zańsyz ań aýlaý boıynsha jeti qylmystyq is qozǵalyp, tabıǵatqa keltirilgen shyǵyn shamamen 50 mln teńgeni quraǵan. Bul isterdiń basym bóligi boıynsha sottar kináli úkim shyǵaryp, tórt jylǵa deıin bas bostandyǵyn shekteý jazasyn taǵaıyndaǵan.
Vedomstvo ókilderiniń aıtýynsha, brakonerlikpen kúres óńir úshin basym baǵyttardyń biri bolyp qala beredi. Oblysta orman kúzeti ınspektorlary men ańshylyq sharýashylyqtardyń qatysýymen reıdtik sharalar jalǵasyp, sırek jáne qorǵaýǵa alynǵan janýarlar túrlerin saqtaý boıynsha baqylaý kúsheıtilip jatyr.
Osydan buryn Aqmola oblysynda 640 keli balyq aýlaǵan brakonerler sottalǵanyn jazǵanbyz.