Jambyl oblysynda úsh myń tonnadan astam jabaıy qarasora joıyldy
TARAZ. KAZINFORM – Jambyl oblysynda «Qarasora-2025» respýblıkalyq jedel-profılaktıkalyq is-sharasy aıasynda úsh myń tonnadan astam jabaıy qarasora joıyldy.
1 maýsymnan bastap óńirde 2023-2025 jyldarǵa arnalǵan keshendi jospar men «Zań jáne tártip» baǵdarlamasyna sáıkes «Qarasora-2025» respýblıkalyq aýqymdy is-sharasy júzege asyrylyp keledi.
Jambyl oblysy Polıtsııa departamentiniń qyzmetkerleri jyljymaly komıssııa quramynda esirtki zattaryn joıý boıynsha aldyn alý jumystaryn júrgizip, aıtarlyqtaı nátıjelerge qol jetkizdi.
- Birlesken is-qımyl josparyna sáıkes, jabaıy qarasora ósetin oshaqtardy anyqtaý jáne joıý jumystary keń kólemde atqaryldy. Arnaıy aýyl sharýashylyǵy tehnıkasyn tarta otyryp, oblystyń qumdy aımaqtaryna jaqyn 4 394,6 gektar aýmaqtaǵy qarasora orylyp, keıinnen jınalǵan ósimdikter órteý arqyly joıyldy, - dep jazdy vedomstvodan.
Joıylǵan qarasoranyń jalpy salmaǵy úsh myń tonnadan asty. Bul shara óńirdegi esirtki qaterin tómendetýge jáne ósimdik tektes esirtki shıkizatynyń zańsyz aınalymǵa túsýin boldyrmaýǵa baǵyttalǵan.
Mamandardyń aıtýynsha, mundaı profılaktıkalyq is-sharalar qoǵamdyq qaýipsizdikti qamtamasyz etýge, sondaı-aq esirtki qylmysyna qarsy kúresti kúsheıtýge sep bolady.
Aıta keteıik, Jambyl oblysynda esirtkini zańsyz saqtap, tasymaldaǵan áke men balasy sottaldy.