Jambyl oblysynda úsh kúdikti 600 keli qarasorany jınap jatqan jerinen ustaldy
ASTANA. KAZINFORM — Jambyl oblysynda polıtseıler 600 kelige jýyq esirtki tárkiledi.
«Qarasora-2026» jedel-profılaktıkalyq is-sharasy aıasynda Jambyl oblysy polıtsııa departamenti esirtki qylmysyna qarsy is-qımyl basqarmasynyń qyzmetkerleri QR ІІM EQQІQD qyzmetkerlerimen, QR Ulttyq ulany 5513 áskerı bóliminiń «Búrkit» arnaıy maqsattaǵy jasaǵynyń áskerı qyzmetshilerimen jáne Jambyl oblysy PD kınologııalyq ortalyǵynyń kınolog-ınspektorymen birlesip, oblystyq prokýratýranyń úılestirýimen jedel-izdestirý is-sharalaryn júrgizdi.
Esirtki zattaryn izdeý jumystaryna Letta esimdi qyzmettik-izdestirý ıti jumyldyryldy.
— Jedel is-sharalar nátıjesinde T. Rysqulov aýdany, Qonaev aýylynyń shamamen 10 shaqyrym jerindegi qumdy alqapta polıtseıler esirtki quramdas ósimdikterdi asa iri mólsherde zańsyz jınaýmen aınalysty degen kúdikpen úsh er adamdy ustady, — dep habarlady polıtsııa.
Aýmaqty tekserý barysynda salmaǵy 595 keli 440 gramm esirtki zattary men quramynda esirtki bar ósimdikter tárkilendi.
Sonymen qatar ósimdikterdi jınaýǵa paıdalanylýy múmkin úsh oraq alyndy.
Atalǵan derek boıynsha QR Qylmystyq kodeksiniń 297-baby 3-bóligimen sotqa deıingi tergep-tekserý bastaldy. Kúdiktiler ýaqytsha ustaý ızolıatoryna qamaldy.
Eske salaıyq, buǵan deıin Jetisýda esirtkiniń iri partııasyn taratpaq bolǵan jas jigit ustalǵanyn habarlaǵan edik.
