Jambyl oblysynda turmystyq zorlyq-zombylyq kórgen 70 áıel kómek surady

TARAZ. KAZINFORM — Aımaqta jyl basynan beri turmystyq zorlyq-zombylyq boıynsha 70 áıel kómek surady. Byltyr mamandar 350-den astam adamǵa keńes berse, óńirde jyl saıynǵy ótinishterdiń ortasha sany 280-ge jýyqtaıdy.

Jambyl oblystyq turmystyq zorlyq-zombylyqtan zardap shekkenderge áleýmettik kómek kórsetý ortalyǵynyń dırektory Aıdana Bıǵabylovanyń aıtýynsha, turmystyq zorlyq-zombylyq jaı urys-keris emes, adamnyń ómirine, densaýlyǵyna, qadir-qasıetine úlken qaýip tóndiredi. Kóbine mundaı másele «jabýly qazan jabýly kúıinde» qalady. Al áıelder uzaq ýaqytqa sozylǵan fızıkalyq, psıhologııalyq nemese ekonomıkalyq qysymnan keıin ǵana kómekke júginedi.

— Ótken jyly bizge 71 áıel habarlassa, bıyl 70 áıel kómek surady. Jyl basynan beri 356 adamǵa keńes berdik. Kóp jaǵdaıda balalar zardap shegedi, sebebi kómek suraǵan áıelderdiń barlyǵynda kámelet tolmaǵan balalar bar, — deıdi maman.

Oblysta eki daǵdarys ortalyǵy bar. Bireýi Taraz qalasynda, ekinshisi Qordaı aýdanynda ornalasqan. Olar ýaqytsha baspanamen qamtamasyz etip, psıhologııalyq jáne áleýmettik qoldaý kórsetedi, zańgerlik keńes beredi. Qajet bolǵan jaǵdaıda balalardy mektep jáne balabaqshamen qamtamasyz etedi. Al eresekterge jumysqa ornalasýǵa jáne kásiptik oqytýǵa kómek kórsetedi.

Ótinishterdiń tolassyz túsýine qaramastan mamandardyń jumysy naqty nátıje berip otyr. Ótken jyly 15, bıyl taǵy segiz áıel jumysqa ornalasqan. Birneshe áıel qysqa merzimdi kýrstar arqyly jańa kásip úırendi. Qıyn jaǵdaıǵa tap bolǵan balalarǵa da qajetti qoldaý kórsetildi. Biraz bala úıirmege qatysty. Sondaı-aq taǵy birshamasy damýy men qaýipsizdigin qamtamasyz etetin mekemelerge ornalastyryldy. Bıyl mamandardyń kómegimen 92 adam — 24 áıel jáne 68 bala otbasyna oraldy.

Turmystyq zorlyq-zombylyq kóbinese jumyssyzdyq pen táýeldiligi bar áleýmettik jaǵdaıy tómen otbasylarda bolady. Onyń negizgi sebepteri — alkogolge táýeldilik, agressııa, túsinbeýshilik.

Ortalyqtyń málimetinshe, 2025 jyly zardap shekkenderdiń 58-i orta bilimdi, 22-i kópbalaly analar, 58-i jumyssyzdar. Al 35-i aýyldyq jerlerde turdy.

Qazir elimizde «Zorlyq-zombylyqqa qarsy 16 kún» aktsııasy ótip jatyr. Jyl saıyn 25 qarashadan bastap, 10 jeltoqsanǵa deıin jalǵasatyn naýqanǵa QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa men Mádenıet jáne aqparat mınıstrligi qoldaý kórsetedi. Onyń maqsaty — turmystyq zorlyq-zombylyq máselesine nazar aýdarý, turǵyndardyń quqyqtyq saýattyn arttyrý, qaıdan kómek suraý kerektigin eske salý.

Jalpy jyl saıyn elimizde turmystyq zorlyq-zombylyq týraly 100 myńnan asa habarlama túsedi. 

Mundaı jaǵdaıda zardap shekkender qaıda júgine alatyny týraly jazdyq.