Jambyl oblysynda turǵynnan 40 keliden astam marıhýana tárkilendi
ASTANA. KAZINFORM — Jambyl oblysynyń polıtsııa departamenti esirtki qylmysyna qarsy is-qımyl basqarmasynyń qyzmetkerleri asa iri mólsherdegi esirtki zattaryn ótkizý maqsatynda zańsyz saqtaý dereginiń jolyn kesti.
Polıtsııanyń habarlaýynsha, Merki aýdanynyń Qosqudyq qumdy alqabynda polıtsııa qyzmetkerleri 40 jastaǵy er adamdy ustady. Jergilikti jerdi qaraý barysynda tártip saqshylary shabylǵan jabaıy qarasora úıindilerin, sondaı-aq olardy tasymaldaýǵa arnalǵan bes bos qapty anyqtady.
Kúdiktiniń aıtýynsha, ol joǵalǵan malyn izdeýge shyqqan. Keıin quramynda esirtkisi bar jabaıy ósimdikterdi jınap, olardy shatyrdyń ústine jaıyp, kepken japyraqtaryn bólip ala bastaǵan. Osy kezde ony polıtsııa qyzmetkerleri ustaǵan.
— Sot-hımııalyq saraptamanyń qorytyndysyna sáıkes, tárkilengen zat jalpy salmaǵy 40 keliden asatyn keptirilgen marıhýana bolyp shyqty, — delingen habarlamada.
Atalǵan derek boıynsha sotqa deıingi tergep-tekserý amaldary júrgizilip jatyr. Kúdikti ýaqytsha ustaý ızolıatoryna qamaqqa alyndy.
Eske salaıyq, buǵan deıin Taılandtan 8,8 keli esirtki ákelmek bolǵan qazaqstandyq 16 jylǵa sottalǵanyn habarlaǵan edik.
