Jambyl oblysynda turǵyndardy aldap, 51 mln jınaǵan erli-zaıyptyǵa úkim shyqty
TARAZ.KAZINFORM - 2026 jylǵy 17 aqpanda Baızaq aýdandyq soty Qylmystyq kodekstiń 190-baby 3-bóliginiń 1), 4) tarmaqtary boıynsha óńirdiń eki turǵynyna qatysty qylmystyq isti qarady.
Sottalýshylar 2024 jyldyń jeltoqsan aıynan bastap aldyn ala sóz baılasý arqyly zańsyz paıda tabý maqsatynda «WhatsApp» messendjerinde ydys-aıaq jáne ózge de turmystyq taýarlardy tómendetilgen baǵamen satý týraly habarlandyrýlar jarııalaǵan. Zańdy qyzmettiń kórinisin jasap, satyp alýshylardyń senimine kirý úshin alǵashqy klıentterge taýarlardy naqty jetkizgen.
Keıinnen basqa azamattardan tapsyrys qabyldap, aqshalaı qarajatty alǵanymen, taýarlardy jetkizý boıynsha mindettemelerin oryndamaǵan, alynǵan qarajatty óz qalaýlarynsha paıdalanǵan.
Qylmystyq áreketter saldarynan 112 adam zardap shegip, olarǵa jalpy somasy 51 288 146 teńge kóleminde materıaldyq zalal keltirilgen. Sot talqylaýy barysynda sottalýshylar kinásyn tolyq moıyndap, jasaǵan isterine ókinetinin bildirdi.
Sot úkimimen kúıeýi 2 jyl 8 aıǵa, jubaıy 2 jyl 4 aıǵa bas bostandyǵynan aıyryldy.
– Jambyl oblysynyń prokýratýrasy azamattardy messendjerler men áleýmettik jeliler arqyly taýar satyp alý kezinde qyraǵylyq tanytýǵa, baǵasy edáýir tómen usynystarǵa tıisti kepildikter men qujattarsyz senbeýge, al alaıaqtyq derekteri týyndaǵan jaǵdaıda dereý quqyq qorǵaý organdaryna júginýge shaqyrady, - delingen habarlamada.
Aıta keteıik, Pavlodarda kıberpolıtseıler zeınetkerdiń 5 mln teńgesin alaıaqtardan saqtap qaldy.