Jambyl oblysynda tumaýǵa qarsy ekpeni kimder tegin alady
ASTANA. KAZINFORM – Maýsymdyq tumaý sozylmaly aýrýlardyń asqynýyna ákelip, naýqasty aýrýhanaǵa jatqyzýǵa májbúr etýi múmkin. Jambyl oblysynyń sanıtarııalyq-epıdemıologııalyq baqylaý departamenti ınfektsııanyń aýyr túrine shaldyǵý qaýpi joǵary turǵyndar sanattaryn atady, dep habarlaıdy Kazinform tilshisi.
Vedomstvonyń málimetinshe, tumaýdy balalar men egde jastaǵy adamdar aýyr ótkerýi múmkin. Sondaı-aq júkti áıelder, ókpe, júrek, baýyr jáne búırektiń sozylmaly aýrýlary bar naýqastarǵa erekshe nazar aýdarý qajet.
Azamattardyń birqatar sanatyna tumaýǵa qarsy vaktsına jergilikti bıýdjet esebinen salynady. Olardyń qatarynda medıtsına qyzmetkerleri jáne medıtsınalyq uıymdarda dınamıkalyq baqylaýda turǵan balalar bar.
Tıisti mekemelerde tárbıelenip jatqan jetim balalar men ata-anasynyń qamqorlyǵynsyz qalǵan balalarǵa, sondaı-aq qarttar men múgedektigi bar adamdarǵa arnalǵan medıtsınalyq-áleýmettik mekemelerdiń turǵyndaryna da vaktsına tegin salynady.
Epıdemıologııalyq kórsetkishter boıynsha vaktsınatsııa bıýdjet qarajaty esebinen basqa da táýekel toptaryna júrgizilýi múmkin. Departament olardyń qatarynda júktiliktiń ekinshi jáne úshinshi trımestrindegi áıelderdi, sozylmaly aýrýlary bar adamdardy jáne 65 jastan asqan turǵyndardy atady.
Vedomstvo vaktsınatsııa tumaýdyń aýyr ótýi, asqyný jáne aýrýhanaǵa jatqyzý qaýpin tómendetetinin atap ótti.
Ekpe aldynda patsıent tekserilip, qarsy kórsetilimderdiń bar-joǵyn anyqtaý úshin dene qyzýy ólshenedi. Vaktsınatsııa adamnyń aqparattandyrylǵan kelisimimen júrgiziledi. Kámeletke tolmaǵandarǵa ekpe ata-anasynyń nemese zańdy ókilderiniń kelisimimen salynady.
Densaýlyq saqtaý mınıstrligi tumaýǵa qarsy vaktsınatsııalaý naýqanyna óńirlerge 2,1 mln doza jetkizilgeni týraly habarlady.
