Jambyl oblysynda Toyota kóligi qaǵyp ketken er adam jansaqtaý bólimine tústi
JAMBYL OBLYSY. KAZINFORM — Jambyl oblysy Turar Rysqulov aýdanynda Toyota kóligi er adamdy qaǵyp ketti. Aýyr jaraqat alǵan azamat aýrýhananyń jansaqtaý bólimine jetkizildi. Jol-kólik oqıǵasyna baılanysty qylmystyq is qozǵaldy.
— Polıtsııanyń aldyn ala málimetinshe, B. esimdi azamat tizgindegen Toyota kóligi joldyń júris bóliginde bolǵan er adamdy qaǵyp ketken. Zardap shekken azamat aýdandyq ortalyq aýrýhananyń jansaqtaý bólimine jatqyzyldy, — dep habarlady polıtsııa.
Buǵan deıin áleýmettik jelilerde kólikti Májilistiń burynǵy depýtaty Baqytjan Bazarbek júrgizgen bolýy múmkin degen aqparat tarady.
Kazinform tilshisi mán-jaıdy naqtylaý úshin Baqytjan Bazarbekke habarlasýǵa tyrysty. Alaıda materıal jarııalanǵan sátke deıin onymen baılanysý múmkin bolmady.
Polıtsııanyń habarlaýynsha, qazir qajetti tergeý amaldary júrgizilip, jol-kólik oqıǵasynyń mán-jaıy anyqtalyp jatyr.
Aıta keteıik, buǵan deıin Jambyl oblysynda polıtsııadan qashqan mas júrgizýshi 7 jylǵa kólik júrgizý quqyǵynan aıyrylǵanyn habarlaǵanbyz.
