Jambyl oblysynda tyıym salynǵan zatty jarnamalaıtyn 65 saıt buǵattaldy

TARAZ. KAZINFORM — Elimizde jyl basynan beri adamǵa kúshti áser etetin zattardy, onyń ishinde azot oksıdiniń zańsyz aınalymy úshin jaza kúsheıtildi. Jambyl oblysynda qańtar aıynda áseri ýytty zatty jarnamalaıtyn ondaǵan saıt buǵattaldy.

2026 jyldyń 1 qańtarynan bastap elimizde kúshti áser etetin zattardyń zańsyz aınalymy úshin qylmystyq jaýapkershilikke tartatyn zańnamalyq túzetýler kúshine endi. Mundaı zattardyń tizimine buryn zııansyz oıyn-saýyq túrinde taralǵan azot oksıdi de kiredi.

Jambyl oblystyq polıtsııa basqarmasynyń habarlaýynsha, óńirde mundaı zattardyń taralýyn qadaǵalaý onlaın rejıminde de kúsheıtilgen. Polıtsııa azot oksıdin satý týraly jarnamalar men aqparattar ornalastyrylǵan veb-saıttar men áleýmettik medıa platformalaryn baqylaıdy.

Esirtkige qarsy kúres basqarmasynyń málimetinshe, qańtar aıynda qyzmetkerler satylymǵa «oıyn-saýyqqa arnalǵan gaz» usynatyn 65 ınternet-resýrsty anyqtaǵan. Olarǵa qol jetkizý zańda belgilengen tártippen shektelgen. Jańa saıttardy anyqtaý jumystary jalǵasyp jatyr.

Al, mamandar azot oksıdin medıtsınalyq emes maqsatta qoldaný qaýipti ekenin eskertedi. Qysqa merzimdi eıforııa jáne relaksatsııa sezimi otteginiń jetispeýshiligimen birge júredi. Gazdy ıngalıatsııalaý bas aınalýdy, koordınatsııany joǵaltýdy, sananyń buzylýyn jáne esten tandyrýy múmkin. Keıbir jaǵdaılarda ustamalar jáne tynys alýdyń toqtaýy týraly habarlanǵan. 

Sonymen qatar, turaqty paıdalaný júıke júıesiniń zaqymdalýyna, V12 vıtamıniniń jetispeýshiligine, anemııaǵa, aıaq-qoldardyń uıýyna jáne turaqty nevrologııalyq buzylýlarǵa ákeledi. Joǵary dozalarda aýyr gıpoksııa, sananyń joǵalýyna baılanysty jaraqat, tipti ólim qaýpi bar.

Aıta keteıik, Almatydaǵy demalys ornynan «oıyn-saýyqqa arnalǵan gaz» tabyldy. Sondaı-aq Shymkenttegi túngi klýbta tyıym salynǵan zattyń 416 ballony saqtalǵan qoıma anyqtaldy.