Áskerde zorlyq kórdim dep ótirik aıtyp, aqsha jınaǵan jigit sottaldy
ASTANA. KAZINFORM — Threads áleýmettik jelisinde zańsyz qarjy jınaý maqsatynda kórineý jalǵan aqparat taratqan Astana qalasynyń 23 jastaǵy turǵynyna qatysty sot úkimi shyqty, dep habarlaıdy Іshki ister mınıstrliginiń baspasóz qyzmeti.
— Tergeý barysynda er azamat jalǵan jarııalanymdy tek materıaldyq paıda tabý maqsatynda jarııalaǵanyn moıyndady. Alaıaqtyq jáne kórineý jalǵan aqparat taratý faktileri boıynsha qylmystyq ister qozǵaldy. Sot úkimimen ol kináli dep tanylyp, 3 jylǵa bas bostandyǵynan aıyryldy, — delingen habarlamada.
Vedomstvonyń málimetinshe, osy jyldyń aqpan aıynda ol anonımdi túrde jarııalaǵan jazbasynda áskerı qyzmet kezinde ózine jynystyq zorlyq-zombylyq jasalǵanyn oıdan shyǵaryp, ómirine qaýip tónip turǵanyn aıtyp, shetelge ketý úshin qarjylaı kómek suraǵan. Jazbaǵa aqsha aýdarýǵa arnalǵan bank rekvızıtterin de qosa kórsetken.
Áleýmettik jelini paıdalanýshylardyń biriniń shaǵymynan keıin júrgizilgen tekserý barysynda jarııalanǵan aqparattyń shyndyqqa sáıkes kelmeıtini anyqtaldy. Sondaı-aq sottalǵan azamattyń eshqashan áskerı qyzmet ótemegeni belgili boldy. Aqsha jınaý úshin ol mán-jaıdy bilmeıtin 17 jastaǵy tanysynyń bank shotyn paıdalanǵan. Eki kúnniń ishinde bul shotqa 15-ten astam aqsha aýdarymy túsken.
Tergep-tekserý barysynda kúdikti jalǵan aqparatty tek aqsha tabý maqsatynda jarııalaǵanyn moıyndady.
Polıtsııa azamattarǵa áleýmettik jelilerdegi tekserilmegen aqparatqa senbeýge jáne beıtanys adamdarǵa aqsha aýdarmaýǵa keńes beredi.
Buǵan deıin Jambylda 25 myń teńge úshin TikTok-ta alaıaqtyq jasaǵan áıel 2,5 jylǵa sottalǵanyn jazǵanbyz.
