Jambyl oblysynda sý qorynyń 50 gektar jeri memleket menshigine qaıtaryldy

ASTANA. KAZINFORM — Sý jáne ekologııalyq zańnamany buzý faktileri boıynsha 11 jer qoınaýyn paıdalanýshylary ákimshilik jaýaptylyqqa tartyldy. Bul týraly Jambyl oblysynyń prokýratýrasynyń baspasóz qyzmeti habarlady. 

Negizgi baǵyty ekologııalyq mádenıetti jáne Bıznestiń tabıǵatqa jaýapkershilikpen qaraýyn qalyptastyrý bolyp tabylatyn «Taza Qazaqstan» Tujyrymdamasyn iske asyrý sheńberinde prokýratýra sý zańnamasynyń saqtalýyna tekserý júrgizdi.

— Asa ózeninde jergilikti atqarýshy organdar belgilegen sý qorǵaý beldeýleriniń shekaralaryna qaramastan paıdaly qazbalar óndirilgeni anyqtaldy. Bul áreketter ózen arnasyn ózgertip qana qoımaı, jaqyn mańdaǵy eldi mekenderdi sý basý qaýpin týdyrdy.

Prokýrorlyq qadaǵalaý aktileri men engizilgen habarlamalardyń negizinde jer qoınaýyn paıdalanýshylar memleketke sý qorynyń 50 gektarǵa jýyq jerin qaıtardy, — delingen habarlamada.

Ákimdik sý qorǵaý aımaqtary men beldeýleri rejıminiń saqtalýyn baqylaýdy kúsheıtý, sondaı-aq jaǵalaýdy nyǵaıtý jumystaryn uıymdastyrý jóninde sharalar qabyldap jatyr.

Aıta ketelik BQO-da paıdalanylmaı jatqan 468 myń gektar jer memleketke qaıtaryldy.