Jambyl oblysynda sý aıdyndarynda qaýipsizdik talaptaryn buzǵan 49 adam jaýapqa tartyldy
ASTANA. KAZINFORM – Jambyl oblysynda jyl basynan beri sý aıdyndaryndaǵy qaýipsizdik talaptaryn buzǵan 49 adam ákimshilik jaýapkershilikke tartyldy. Bul týraly oblystyq Tótenshe jaǵdaılar departamenti habarlady.
Vedomstvo málimetinshe, Ákimshilik quqyq buzýshylyq týraly kodekstiń 412-baby boıynsha salynǵan aıyppuldardyń jalpy somasy 741 myń teńgeden asty.
Demalys jáne mereke kúnderi qutqarýshylar, polıtsııa qyzmetkerleri jáne jergilikti atqarýshy organdardyń ókilderi sý aıdyndarynda reıdter ótkizip, profılaktıkalyq jumystar júrgizip keledi. Qaýipti ýchaskelerge júzdegen tyıym salatyn jáne eskertý belgileri ornatylǵan.
– Bıyl oblys aýmaǵynda shomylýǵa tek 12 orynda ǵana ruqsat berilgen. Olardyń qatarynda Seńgirbaı, Teris-Aşybulaq, Tasótkel sý qoımalary, Qarabastaý bulaǵy, Jańatas qalasyndaǵy Ortalyq saıabaq kóli, «Gavaıı-Qordaı» jáne «Aqbulaq» demalys aımaqtary, sondaı-aq Shý ózenindegi eki jaǵajaı bar. Al Taraz qalasynda bıyl resmı túrde shomylýǵa ruqsat etilgen oryn joq, – dep málimdedi oblystyq TJD.
Buǵan deıin elimizde shomylý maýsymy bastalǵaly beri 68 adamnyń, onyń ishinde 24 balanyń sýǵa batyp ketkeni habarlanǵan bolatyn. Qaıǵyly oqıǵalardyń 90 paıyzdan astamy shomylýǵa tyıym salynǵan ári jabdyqtalmaǵan oryndarda tirkelgen.
– Azamattardy sý aıdyndarynda qaýipsizdik talaptaryn qatań saqtaýǵa, tek ruqsat etilgen oryndarda ǵana shomylýǵa jáne balalardy qaraýsyz qaldyrmaýǵa shaqyramyz, – dep eskertti vedomstvo.
Aıta keteıik, shomylý maýsymy bastalǵaly beri 69 bala sýǵa batyp qaza tapty.
