Jambyl oblysynda sottar tergeýge qatysty árbir úshinshi shaǵymdy qanaǵattandyrdy
ASTANA. KAZINFORM – Jambyl oblysynda sottar bıylǵy alǵashqy alty aıda qylmystyq qýdalaý organdarynyń áreketteri men sheshimderine qatysty qaralǵan 108 shaǵymnyń 31-in qanaǵattandyrdy.
Áńgime Qylmystyq-protsestik kodekstiń 106-babyna sáıkes berilgen shaǵymdar týraly bolyp otyr. Bul bap sotqa deıingi tergep-tekserý barysynda qylmystyq qýdalaý organdarynyń áreketterine, áreketsizdigine jáne qabyldaǵan sheshimderine sot arqyly shaǵymdanýǵa múmkindik beredi.
Osylaısha, sottar qaralǵan shaǵymdardyń shamamen árbir úshinshisin negizdi dep tanydy. Bul kórsetkish respýblıkalyq ortasha deńgeıden tómen. Oblystyq sottyń málimetinshe, el boıynsha mundaı shaǵymdardyń orta eseppen 37 paıyzy qanaǵattandyrylady.
Tergeý sýdıalarynyń jumysy munymen shektelmeıdi. Bıylǵy birinshi jartyjyldyqta olardyń qaraýyna barlyǵy 2 971 materıal tústi. Esepti kezeńniń sońyna deıin onyń 2 967-si qaralyp bitti.
Sotqa deıingi tergeý aıaqtalǵannan keıin aıyptalýshylardyń ustanymy ózgerýi múmkin ekenin taǵy bir kórsetkish ańǵartady. Alty aı ishinde sottar 28 adamǵa qatysty 17 qylmystyq isti prokýrorlarǵa keri qaıtardy.
Mundaı isterdiń basym bóliginde aıyptalýshylar sotqa deıingi tergeý kezinde kinásin moıyndaǵan. Alaıda sot talqylaýy barysynda olar burynǵy jaýabynan bas tartqan nemese taǵylǵan aıyptyń kólemimen kelispeıtinin málimdegen.
Buǵan deıin Jambyl oblysynda tergeý sýdıalary qamaýǵa alý týraly ótinishterdiń úshten ekisin maquldaǵany habarlanǵan bolatyn.
Osyǵan deıin Jambyl oblysynda ákimshilik daýlardyń úshten biri sot oryndaýshylaryna qatysty bolǵany týraly jazdyq.
