Jambyl oblysynda sottar qamaýǵa alý týraly ótinishterdiń úshten ekisin maquldaǵan
ASTANA. KAZINFORM – Jambyl oblysynda bıylǵy alǵashqy alty aıda tergeý sýdıalary qamaýǵa alý týraly túsken 461 ótinishhattyń 303-in qanaǵattandyrdy. Bul barlyq ótinishtiń 65,9 paıyzyn quraıdy, dep habarlaıdy Kazinform agenttiginiń óńirdegi tilshisi.
Jalpy tergeý sýdıalarynyń qaraýyna 2 971 materıal kelip tústi. Esepti kezeńniń sońyna deıin onyń 2 967-si qaraldy.
Eń mańyzdy máselelerdiń biri bultartpaý sharasyn tańdaý boldy. Qylmystyq qýdalaý organdary qamaýǵa alý týraly 461 ótinishhat joldap, onyń 303-i sýdıalar tarapynan qanaǵattandyryldy. Osylaısha, ótinishterdiń 65,9 paıyzy boıynsha qamaýda ustaýǵa sanktsııa berildi.
Qamaýǵa alýmen qatar elektrondyq baqylaý quraldary da qoldanyldy. Alty aı ishinde olar 137 ret paıdalanyldy, onyń ishinde jaǵdaılardyń jartysyna jýyǵy tergeý sottaryna tıesili boldy. Aýdandyq sottardyń ishinde mundaı shara eń kóp Merki, Shý jáne Talas aýdandyq sottarynda qoldanylǵan.
Budan bólek, tergeý sýdıalary qylmystyq qýdalaý organdarynyń áreketterine qatysty 108 shaǵymdy qarady. Onyń 31-i boıynsha talaptar negizdi dep tanyldy.
Aıta keteıik, buǵan deıin Qazaqstanda sotqa deıin qamaýǵa alynǵandarǵa elektrondyq bilezik engizilýi múmkin ekeni habarlandy.
Sondaı-aq sot júıesine degen senim deńgeıi 63,2 paıyzǵa deıin ósti.
