Jambyl oblysynda sheteldikterdi jalǵan tirkeý derekteri anyqtaldy
TARAZ. KAZINFORM – Jambyl oblysy Qordaı aýdanynyń prokýratýrasy shetel azamattaryn olardyń naqty turmaıtyn mekenjaılaryna jalǵan tirkeý derekterin anyqtady.
Prokýratýra málimetinshe, Qordaı aýdanynyń Qalǵuty aýylyndaǵy úılerdiń birine Ózbekstan Respýblıkasynyń 12 azamaty tirkelgenimen, olar is júzinde Almaty qalasynda turyp, jumys istegen.
Osyndaı zańbuzýshylyqtar Sortóbe aýylynda da anyqtalǵan.
Onda Qyrǵyz Respýblıkasynyń 9 azamaty jalǵan tirkeýge qoıylyp, naqtysynda basqa óńirlerde eńbek etkeni belgili boldy.
Prokýratýra mundaı shemalar kóshi-qon esebin burmalap, qoǵamdyq qaýipsizdikke qater tóndirýi múmkin ekenin málimdedi.
Prokýrorlyq qadaǵalaý aktileri negizinde jalǵan tirkeýlerdiń kúshi joıylyp, kináli tulǵalar jaýapkershilikke tartylǵan.
- Sonymen qatar prokýratýranyń úılestirýimen sheteldik jumys kúshin birneshe ret zańsyz paıdalanǵandarǵa qatysty qylmystyq jaýapkershilik qoldaný tájirıbesi engizilgen.
Atap aıtqanda, shetel azamattaryn zańsyz jumysqa tartqany úshin buǵan deıin eki ret ákimshilik jaýapkershilikke tartylǵan dámhana ıesi 2025 jylǵy jeltoqsan men 2026 jylǵy qańtarda taǵy da osyndaı zańbuzýshylyqqa jol bergen.
Tekserý barysynda onyń shetel azamattaryn ruqsat qujattarynsyz jáne eńbek qatynastaryn rásimdemeı jumysqa qabyldaǵany anyqtalǵan, - dep jazdy vedomstvodan.
Atalǵan fakti boıynsha Qazaqstan Respýblıkasynyń Qylmystyq kodeksiniń 395-baby negizinde sotqa deıingi tergep-tekserý bastalyp, is sotqa joldanǵan.
Sot úkimimen kináli tulǵaǵa 50 aılyq eseptik kórsetkish kóleminde aıyppul salyndy.
Qordaı aýdanynyń prokýratýrasy kóshi-qon zańnamasyn júıeli túrde buzatyn tulǵalarǵa qatysty qylmystyq-quqyqtyq sharalar zańsyz kóshi-qonǵa qarsy kúrestiń tıimdi tetigi ekenin atap ótti.
Aıta keteıik, eńbek ımmıgranttaryna arnalǵan memlekettik qyzmet tolyqtaı onlaın formatqa kóshiriledi.
