Mototsıkl júrgizýshisin jaralaǵan kúdikti eki aıǵa qamaldy - ІІM
ASTANA. KAZINFORM — Jambyl oblysynda janarmaı quıý beketinde mototsıkl júrgizýshisin jaralaǵan kúdikti eki aıǵa qamaýǵa alyndy. Bul týraly QR Іshki ister mınıstriniń orynbasary Sanjar Ádilov málim etti.
- Polıtseıler qylmysty izin sýytpaı ashty. Kúdikti ustalyp, kim ekeni anyqtalyp, dereý ýaqytsha ustaý ızolıatoryna qamaldy. Tintý kezinde qylmysty jasaǵan qarý – pyshaq tárkilendi. Jedel-izdestirý sharalary barysynda ol kúdikti retinde tanyldy. Endi sot sheshimimen ol eki aı merzimge qamaýǵa alyndy, - dedi Sanjar Ádilov Parlament Májilisinde tilshiler suraǵyna jaýap bere otyryp.
Onyń aıtýynsha, aldaǵy ýaqytta atalǵan oqıǵa boıynsha túrli sot-medıtsınalyq jáne basqa da saraptamalar jasalady.
Budan buryn habarlanǵandaı, Jambyl oblysynyń Merki aýdanynda janarmaı quıý beketinde sýyq qarýdy qoldaný arqyly jasalǵan shabýyl faktisi boıynsha ishki ister organdary qylmystyq isti tergep jatyr.
Sonymen qatar advokattyń ótinishi boıynsha jábirlenýshige polıtsııa qyzmetkerleri qatarynan kúzet qamtamasyz etildi.