Jambyl oblysynda sharýa qojalyqtyń 300 bas maly urlandy
ASTANA. KAZINFORM — Jambyl oblysynyń krımınaldyq polıtsııa qyzmetkerleri jedel áreket etip, usaq mal urlyǵyna qatysy bar eki kúdiktini qolǵa túsirdi. Kúdiktiler urlanǵan maldy Túrkistan oblysyndaǵy bazarǵa jetkizýdi josparlanǵan.
Polisia.kz málimetinshe, mal urlyǵy Baızaq aýdanynyń Sarybaraq aýylyndaǵy sharýa qojalyǵynyń qorasynan túngi ýaqytta bolǵan. Qojaıynnyń joqtyǵyn paıdalanǵan kúdiktiler qoılardy kórshiles qaraýsyz qalǵan sharýa qojalyǵynyń aýmaǵyna aıdap aparǵan. Keıin maldy júk kóligine tıep, kúdiktilerdiń biriniń úıine jetkizgen. Jábirlenýshiniń aıtýynsha, barlyǵy 300 bas mal urlanǵan.
Jedel-izdestirý sharalary barysynda polıtseıler oqıǵa ornyndaǵy izder men júk kóliginiń dóńgelek protektorlarynyń tańbalaryn muqııat zerttegen.
Kólik pen kúdiktilerdiń jeke basy anyqtalǵannan keıin jedel basqarý ortalyǵynyń beınebaqylaý kameralary arqyly urlanǵan maldy Túrkistan oblysyna áketý áreketiniń joly kesildi. Nátıjesinde tasjolda qoı tıelgen eki júk kóligi toqtatyldy.
Atalǵan derek boıynsha QR Qylmystyq kodeksiniń 188-1-babynyń 4-bóligimen sotqa deıingi tergep-tekserý bastaldy. Kúdiktiler ýaqytsha ustaý ızolıatoryna qamaldy.
Polıtseılerdiń úılesimdi jumysynyń nátıjesinde urlanǵan maldy basqa óńirge áketý áreketine der kezinde tosqaýyl qoıylyp, mal basynyń saqtalýy qamtamasyz etildi.
Buǵan deıin aımaqta 34 mln teńgeniń maly urlandy.
