Jambyl oblysynda satyp alynǵan jer telimine bóten dúken rásimdelgen
ASTANA. KAZINFORM – Jambyl oblysynda 2 mln teńgege satyp alynǵan jer telimine qatysty daý sotta kútpegen jaıtty anyqtady. Bir jer telimine eki memlekettik akt berilgeni belgili boldy, dep habarlaıdy Kazinform agenttiginiń tilshisi.
Jerdi satyp alǵannan keıin jańa ıesinde qujattardyń zańdylyǵyna kúmán bolmaǵan. Alaıda ákimdikten qosymsha málimet suratqan soń, ol kúrdeli máselege tap boldy.
Anyqtalǵandaı, satyp alynǵan jerdiń shamamen 40 paıyzyn kúrdeli qurylys nysany – dúken alyp jatqan. Satyp alýshy bul aýmaq ózine tıesili dep eseptegen.
Jańa menshik ıesi ǵımaratty buzýdy talap etkenimen, dúken ıesi buǵan kelispedi. Ol da daýly jerge qatysty qujattary bar ekenin málimdedi. Sot barysynda bul jer telimine shynynda da eki memlekettik akt berilgeni rastaldy.
Talap qoıýshy Jýaly aýdandyq sotyna zańsyz salynǵan qurylysty buzý týraly talap-aryz bergen. Alaıda is sot sheshimine deıin jetpeı, taraptar medıatsııa tártibimen tatýlasýǵa kelisti.
Kelisimge sáıkes, jaýapker dúken ornalasqan jer telimin óz qarajaty esebinen zańdastyryp, talapkerge 800 myń teńge ótemaqy tóleıtin boldy. Al talapker jer teliminiń qalǵan bóligine belgilengen tártippen qujat rásimdeıdi.
Sot medıatıvtik kelisimdi bekitip, is boıynsha óndiristi toqtatty. Talapker tólegen memlekettik baj qaıtarylady.
Aıta keteıik, buǵan deıin Abaı oblysynda bir jer telimine úsh menshik ıesi talasqan daýǵa sot úkimi shyqqany habarlanǵan. Birneshe jylǵa sozylǵan daýda ákimdiktiń sot sheshiminsiz jer shekarasyn ózgertý áreketi zańsyz dep tanyldy.
Sondaı-aq Tarazda zańsyz salynǵan saýda kesheni súriletinin jazdyq.
