Jambyl oblysynda sarkoma dıagnozymen 183 naýqas esepte tur
ASTANA. KAZINFORM — Oblystyq onkologııalyq ortalyqtyń baqylaýynda sarkoma dıagnozy qoıylǵan 183 adam bar. Jyl basynan beri olardyń qataryna taǵy 16 naýqas qosyldy.
Jambyl oblysyndaǵy onkologııalyq aýrýlardyń jalpy qurylymynda sarkoma 8-9-oryndardy ıelenedi. Dárigerler jyl saıyn oblystyń 25-30 turǵynyna alǵash ret osy dıagnozdy qoıyp, dıspanserlik esepke alady.
Sarkoma – bir ǵana aýrý emes, súıek pen jumsaq tinderde paıda bolatyn sırek kezdesetin qaterli isikterdiń tutas bir toby. Onyń keıbir túrleri tez ósip, emnen keıin qaıta paıda bolýy jáne basqa aǵzalarǵa metastaz berýi múmkin. Aýrýdyń boljamy kóbine isiktiń qaı satyda anyqtalǵanyna baılanysty. Sondyqtan dıagnoz qoıylǵannan keıin birneshe jyl ómir súrip jatqan naýqastardyń sany emdeýdiń uzaq merzimdi nátıjesin baǵalaýda mańyzdy kórsetkish sanalady.
Sońǵy jyldary sarkomanyń jańa jaǵdaılarynyń sany ózgerip otyrǵanymen, mamandar turaqty ósim baıqalmaıtynyn aıtady. 2022 jyly dıagnoz alǵash ret 29 naýqasqa qoıylsa, 2023 jyly – 24, 2024 jyly – 20 adamnan anyqtalǵan. Ótken jyldyń qorytyndysy boıynsha 25 adam dıspanserlik esepke alynǵan.
2026 jylǵy dınamıkaǵa baǵa berýge ázirge erte. Degenmen jyldyń alǵashqy alty aıynda oblystyń 16 turǵynynan bul aýrý anyqtaldy.
Qazirgi tańda dárigerlerdiń baqylaýyndaǵy 183 naýqastyń 107-sine dıagnoz qoıylǵanyna 5 jyldan astam ýaqyt ótken. Esepte turǵandardyń 58,5 paıyzy bes jyldyq mejeden asqan. Oblystyq onkologııalyq ortalyq mamandary sarkomanyń keıbir túrleri agressıvti sıpatta ótetinin eskersek, bul kórsetkishti jaqsy nátıje dep baǵalap otyr.
Dárigerler emdeý taktıkasyn ár naýqasqa jeke tańdaıdy. Emdeý hırýrgııalyq operatsııany, sáýlelik jáne hımıoterapııany, sondaı-aq targettik nemese ımmýndyq terapııany qamtýy múmkin. Ádisti tańdaý isiktiń túrine, ornalasqan jerine jáne qanshalyqty taralǵanyna baılanysty.
Aıta keteıik, elde onkologııalyq qyzmettiń biryńǵaı tsıfrlyq platformasy iske qosylady.
