Jambyl oblysynda salmaq baqylaý tártibin buzǵan tasymaldaýshyǵa aıyppul salyndy

ASTANA. KAZINFORM — Kólik mınıstrliginiń Kóliktik baqylaý ınspektsııasynyń qyzmetkerleri aýyr salmaqty jel generatorlarynyń bólshekterin tasymaldaıtyn «M neftServıs» JShS-niń kólik quraldaryn ólshedi. Bul týraly Kólik mınıstrliginiń baspasóz qyzmeti málimdedi.

Ólsheý nátıjesi boıynsha orta eseppen alǵanda kólikke tıelgen artyq júk mólsheri 85 tonnany kórsetti. Osylaısha, el bıýdjetine túsetin qosymsha qarajat 26 mln 850 myń teńgeni qurady.

«USSO» AQ geodezısti men mamandary ólsheý rásiminde qoldanylǵan tarazy jabdyǵy men alańǵa qoıylatyn talaptardyń sáıkestigin rastady. Aýyr júkti ólsheý tasymaldaýshy «M neftServıs» JShS dırektorynyń jáne Bas kólik prokýratýrasy ókilderiniń qatysýymen júzege asyryldy. 

Kóliktik baqylaý nátıjesi boıynsha ákimshilik quqyq buzýshylyq týraly 22 hattama toltyryldy:
1) arnaıy ruqsattaǵy salmaq parametrleri 85 tonnaǵa asqany;
2) júrgizýshilerdiń eńbek jáne demalys tártibin buzýy;
3) laýazymdy adamdarǵa jumys barysynda kedergi jasaý;
4) halyqaralyq tasymaldaýǵa ruqsat kartasynyń bolmaýy.

Buǵan deıin bul tasymaldaýshy ólsheý rásiminen bas tartyp, BAQ arqyly shyndyqqa janaspaıtyn jalǵan aqparat taratty.

Esterińizge sala keteıik, kólik quraldarynyń salmaǵyn der kezinde ólshemeý joldyń merziminen buryn tozýyna ákeledi.

— Kólik mınıstrligi aýyr júk kólikterine kóliktik baqylaýdy kúsheıtedi. Barlyq júk tasymaldaýshylardy kólik zańnamasynyń talaptaryn qatań saqtap, salmaqtyq jáne gabarıttik parametrlerdi normadan asyrmaýǵa shaqyramyz,  — dep eskertti mınıstrlik.

Buǵan deıin habarlaǵanymyzdaı, Kólik mınıstrligi bıtým baǵasyn ákimshilik jolmen rettemek.