Jambyl oblysynda iri kólemde esirtki saqtaǵan turǵyn ustaldy

TARAZ. KAZINFORM – Jambyl oblysynda polıtseıler respýblıkalyq «Qarasora» jedel-aldyn alý is-sharasy barysynda 3 keliden astam keptirilgen marıhýanany saqtaý deregin anyqtady. Bul týraly óńirdegi polıtsııa departamenti habarlady.

Sarysý aýdanynyń 33 jastaǵy turǵynyn tártip saqshylary «Asa – Taraz» avtojolynda Volkswagen Passat kóligimen úıine qaıtyp bara jatqan kezinde toqtatqan. Arnaıy úıretilgen Sem atty qyzmettik ıt kólik ishinen esirtki zatyn taýyp bergen.

Aldyn ala málimet boıynsha, kúdikti buǵan deıin arnaıy daıyndalǵan jasyryn ornynan esirtki salynǵan túıinshekterdi alyp ketken.

Ustalǵan azamat kinásin moıyndady.

- Bul derek boıynsha Qylmystyq kodekstiń 296-baby 4-bóligine (esirtki zattaryn iri mólsherde zańsyz saqtaý) sáıkes sotqa deıingi tergeý bastaldy, - delingen aqparatta.

Aıta keteıik, Jambyl oblysynda 4 500 gektar alqap qarasoradan tazartyldy.