Jambyl oblysynda iri ınvestordyń eksporttyq kedergileri joıyldy

ASTANA. KAZINFORM — Jambyl oblysynda Investorlardyń quqyqtaryn qorǵaý komıtetiniń úılestirýimen prokýratýra iri ınvestor — «KorCem» JShS-niń transshekaralyq eksport máselesin sheshti, dep habarlaıdy oblystyq prokýratýranyń baspasóz qyzmeti.

Buǵan deıin kásiporyn tsement ónimderin Qyrǵyz Respýblıkasyna eksporttaý kezinde birqatar qıyndyqqa tap bolǵan. Atalǵan problema oblys prokýrorynyń Qordaı aýdanynda bıznes ókilderimen ótkizgen kezdesý barysynda kóterilgen. Memlekettik shekaradaǵy kidirister saldarynan eksportqa baǵyttalǵan jobanyń jetkizý kestesiniń buzylý qaýpi týyndaǵan.

— Máseleni jedel sheshý maqsatynda prokýratýra Shekara qyzmetimen jáne Memlekettik kirister departamentimen ózara is-qımyldy uıymdastyrdy. Nátıjesinde memlekettik shekaradaǵy alternatıvti ótkizý pýnkti arqyly eksporttyq aǵyndardy qaıta baǵyttaýǵa múmkindik beretin quqyqtyq tetikter aıqyndaldy. Qadaǵalaý organynyń aralasýynyń arqasynda «KorCem» JShS tsementti úzdiksiz jóneltýdi qamtamasyz etip, jetkizý kólemin arttyrdy, — delingen habarlamada.

Vedomstvo atap ótkendeı, óńir ekonomıkasy úshin mańyzy bar ınvestıtsııalyq jobalardy súıemeldeý jumystary jalǵasady jáne erekshe baqylaýda bolady.

Budan buryn Prezıdent memleket ınvestorlar aldyndaǵy mindettemelerin tolyq oryndaýy kerek ekenin basa aıtqan edi.