Jambyl oblysynda prokýrorlar 7,7 myńnan astam kásipkerdiń quqyǵyn qorǵady
ASTANA. KAZINFORM – Jambyl oblysynyń prokýrorlary jyl basynan beri 7,7 myńnan astam kásipkerdiń, onyń ishinde ınvestorlardyń quqyqtaryn qorǵady.
Jýaly aýdany prokýratýrasy júrgizgen taldaý barysynda áleýmettik mańyzy bar taýar óndirýshilerden elektr energııasy úshin joǵary tarıfpen aqy alý derekteri anyqtaldy.
Memlekettik qoldaý sharalaryna sáıkes, mundaı óndirýshiler elektr energııasyn jeńildetilgen tarıfpen tóleýi tıis.
Alaıda jyl basynan beri 7 áleýmettik mańyzy bar taýar óndirýshi elektr energııasynyń 1 kVt/saǵ úshin belgilengen 35,12 teńgeniń ornyna 38,44 teńge tólep kelgeni belgili boldy.
– Osylaısha, kásipkerler memleket qarastyrǵan jeńildikterdi tolyq kólemde ala almaǵan. Prokýrorlyq qadaǵalaý sharalarynyń nátıjesinde anyqtalǵan zań buzýshylyqtar joıylyp, kináli tulǵalar tártiptik jaýapkershilikke tartyldy, – delingen habarlamada.
Prokýratýra málimetinshe, kásipkerlik qyzmetke zańsyz aralasý máselelerine erekshe nazar aýdarylyp otyr.
Atqarylǵan jumystar nátıjesinde baqylaýshy organdar tarapynan 51 bıznes sýbektisine qatysty negizsiz tekserý júrgizýge jol berilmedi.
Sonymen qatar kásipkerlik qyzmetke zańsyz aralasqany úshin 23 laýazymdy tulǵa ákimshilik jaýapkershilikke tartyldy.
Budan bólek, oblys ákimdiginiń Jer resýrstaryn basqarý basqarmasy tarapynan aýyl sharýashylyǵy maqsatyndaǵy jerlerdi berý konkýrstaryn ótkizý kezinde kelisý rásimderin negizsiz talap etý tájirıbesine tosqaýyl qoıyldy.
Quqyqtary men zańdy múddeleri buzylǵan kásipkerler +7 (775) 891-25-52 telefony arqyly habarlasa alady.
Aıta keteıik, Jambyl oblysynda 47,5 myń gektar jer memleketke qaıtaryldy.
