Jambyl oblysynda polıtsııadan qashqan mas júrgizýshi 7 jylǵa kólik júrgizý quqyǵynan aıyryldy
ASTANA. KAZINFORM — Patrýldeý barysynda polıtsııa qyzmetkerleri jol qozǵalysy erejesin buzǵan Toyota Carina avtokóligin baıqap, júrgizýshini toqtatpaq boldy.
Alaıda oblys ortalyǵynyń 33 jastaǵy turǵyny polıtseılerdiń talabyna baǵynbaı, boı tasalaýǵa áreket jasaǵan. Patrýldik polıtsııa qyzmetkerleriniń jedel ári kásibı áreketteriniń nátıjesinde quqyq buzýshy kóp uzamaı ustaldy.
Tekserý barysynda júrgizýshiniń alkogoldik masań kúıde bolǵany anyqtalyp, medıtsınalyq kýálandyrý nátıjesimen rastaldy.
Quqyq buzýshynyń aıtýynsha, ol jubaıymen janjaldasyp, ashýlanyp kólikke otyrǵan. Osy sebepti polıtsııa qyzmetkerleriniń toqtaý týraly talabyna baǵynbaı, qala ishindegi kósheler men burylys joldar arqyly qashyp ketpek bolǵan.
Júrgizýshige kólik quralyn alkogoldik masań kúıde basqarǵany jáne polıtsııa qyzmetkeriniń kólik quralyn toqtatý týraly zańdy talabyn oryndamaǵany úshin ákimshilik jaýapkershilik júkteldi.
Sot sheshimimen ol 7 jyl merzimge kólikti basqarý quqyǵynan aıyrylyp, 15 táýlikke ákimshilik qamaqqa alyndy jáne 145 myń teńge kóleminde aıyppul salyndy.
Bul sapardyń sońy qaıǵyly jaǵdaımen aıaqtalýy múmkin edi. Mas kúıinde kólik basqaratyn júrgizýshilerdiń kinásinen aýyr zardaptarǵa, sonyń ishinde adam ólimine ákep soǵatyn jol-kólik oqıǵalary bolýy ábden múmkin.
Aıta keteıik, jyl basynan beri Jambyl oblysynda kólik quralyn alkogoldik masań kúıde basqarǵan 923 júrgizýshi ustaldy.
Aıta ketelik Almatyda kartıng kólikterimen kóshege shyqqan júrgizýshiler toby jazalanǵan edi.
