Jambyl oblysynda polıtseıler halyqaralyq izdeýde júrgen kúdiktini ustady
TARAZ. KAZINFORM – Jambyl oblysy polıtsııa departamentiniń patrýldik polıtsııa qyzmetkerleri halyqaralyq izdeýde júrgen azamatty qolǵa túsirdi.
Almaty — Tashkent avtojolynyń 219-shaqyrymynda patrýldik polıtsııa jasaǵy baǵdar boıynsha izdeýde júrgen kólikke uqsaıtyn Audi avtokóligin toqtatqan.
Tekserý barysynda kóliktiń artqy oryndyǵynda otyrǵan 44 jastaǵy er adamnyń kórshi memlekettiń quqyq qorǵaý organdary tarapynan birneshe ret, sonyń ishinde asa iri kólemdegi alaıaqtyq deregi boıynsha izdeýde júrgeni anyqtaldy.
Kúdikti zań talaptaryna sáıkes ustalyp, Kordaı aýdandyq polıtsııa bólimine jetkizildi. Keıinnen ol Qyrǵyz Respýblıkasy mılıtsııasynyń ókilderine resmı tártippen tapsyryldy. Tártip saqshylarynyń qyraǵylyǵy men jedel is-qımylynyń nátıjesinde aýyr qylmysqa qatysy bar tulǵa ustalyp, ádildik saltanat qurdy.
Aıta ketelik «PokStars» jáne «LuckyShark» isteri boıynsha tergeý aıaqtalyp, úkim shyqty.