Jambyl oblysynda polıtseıler bir adamnyń ómirin qutqaryp qaldy

TARAZ. KAZINFORM – Jambyl oblysynda polıtseıler der kezinde qaıǵyly jaǵdaıdyń aldyn aldy, – dep jazdy Polisia.kz.

Jambyl oblysynda polıtsııa qyzmetkerleri arnaıy esepte turǵan azamattarmen kúndelikti profılaktıkalyq jumystar júrgizedi. Jambyl aýdanynda ótkizilgen osyndaı kezekti aralaý barysynda polıtseıler qaıǵyly jaǵdaıdyń aldyn alyp, bir adamnyń ómirin qutqaryp qaldy.

Ýchaskelik ınspektorlar esepte turǵan azamattardy tekserý kezinde turǵyn úıdiń birinen er adamdy asa aýyr jaǵdaıda tapty. Ol jatyn bólmede jylytý qubyryna asylyp, ómirmen qoshtaspaq bolǵan.

Polıtsııa qyzmetkerleri tez arada ishke kirip, kásibı úılesimdi áreketterimen er adamdy bosatyp aldy. Sondaı-aq, oǵan alǵashqy medıtsınalyq kómek kórsetti. Zardap shekken azamat jedel túrde aýdandyq aýrýhanaǵa jetkizildi.

Dárigerlerdiń málimetinshe, qazirgi tańda onyń densaýlyǵyna qaýip tónip turǵan joq. Er adamnyń týystary ómirin qutqaryp qalǵan polıtsııa qyzmetkerlerine shynaıy alǵys bildirdi. Olardyń kásibıligi, jedeldigi men jaǵdaıǵa nemquraıly qaramaǵany úshin rızashylyqtaryn jetkizdi.

Buǵan deıin Pavlodar oblysynda taksı júrgizýshi zeınetkerdi alaıaqtardan qutqaryp qalǵanyn jazǵan edik.