Jambyl oblysynda polıtseıler boranda qalǵan júkti júrgizýshige kómek kórsetti

TARAZ. KAZINFORM – Jambyl oblysynda qalyń qar jaýyp, joldyń kórinýi shektelýine baılanysty avtojoldarda qozǵalys qıyndady. Saldarynan shamamen 2200 júk kóligi qar qursaýynda qaldy.

Qolaısyz aýa raıyna baılanysty tártip saqshylary oblys aýmaǵyndaǵy jol jaǵdaıyn táýlik boıy baqylap, júrgizýshilerge kómek kórsetip, kólik qozǵalysyn retteýde.

Jýaly aýdany aýmaǵyndaǵy Kúıik asýynda polıtsııa qyzmetkerleri qarly boran saldarynan jolda qalǵan júk kóliginiń júrgizýshisi Oksana Shevchýkke járdem berdi. Kópbalaly ana júktiliktiń segizinshi aıynda ekeni belgili boldy. Polıtseıler oǵan ystyq shaı usynyp, tamaqtandyryp, keıin jaqyn mańdaǵy jylytý pýnktine jetkizip, qaýipsizdigin qamtamasyz etti.

«Biz osy jolda eki kún boıy turdyq. Polıtsııa qyzmetkerleri kómek kórsetip, jaǵdaıdy baqylaýda ustap, tártipti qadaǵalap otyr», – dedi júrgizýshi Asqar Musylmanov.

Qazirgi ýaqytta polıtseıler jol qozǵalysy qaýipsizdigin qamtamasyz etý jumystaryn jalǵastyryp, zań talaptarynyń saqtalýyn qadaǵalaýda.

Aıta keteıik, buǵan deıin Almaty oblysynda jol jabylǵany habarlandy.