Jambyl oblysynda polıtseıler balalarǵa tosyn syı jasady
ASTANA. KAZINFORM – Jańa jyl qarsańynda Jambyl oblysy Polıtsııa departamenti arnaıy áleýmettik qyzmetterge muqtaj balalardy qoldaý ortalyǵynyń tárbıelenýshileri úshin «Bir balanyń armanyn orynda» atty júrekke jylý syılaıtyn qaıyrymdylyq aktsııasyn uıymdastyrdy.
Balalar Aıaz ataǵa ózderiniń eń asyl armandaryn jazdy.
Búldirshinderdiń jazbalarynda tehnıka men vırtýaldy shyndyq qurylǵylary, oıynshyqtar men kitaptar, kóılek men kosmetıka, sport kıimderi men qural-jabdyqtar, tarıhı jáne kórkem ádebıetter týraly tilekter boldy.
Hattardyń birinde bolashaqta polıtsııa qyzmetkeri bolý jáne osy jolda alǵashqy qadam jasaýǵa kómektesetin daıyndyq kitaptaryna ıe bolý týraly erekshe arman jazylǵan.
Bul hattar jaýapsyz qalǵan joq. Aktsııany departament basshylyǵynan bastap, qarapaıym qyzmetkerlerge deıin barlyq bólim qyzmetkeri bir kisideı qoldady.
Nátıjesinde balalardyń birde-bir tilegi oryndalmaı qalǵan joq.
Hattarda jazylǵan barlyq syılyq satyp alyndy. Syılyqtardy mereke qarsańynda polıtsııa departamentiniń bastyǵy Qaısar Sultanbaev balalarǵa jeke ózi tabystady.
Armandary oryndalǵan balalardyń qýanyshy shynaıy ári erekshe boldy. Mundaı ıgi bastamalar shynaıy kóńil men adamı janashyrlyqtyń balalarǵa úmit syılap, olardyń álemin jaryq ete alatynyn taǵy bir márte kórsetedi.
Aıta ketelik qazaqstandyqtar Tájikstandaǵy balalar onkologııa ortalyǵyndaǵy naýqastarǵa jańajyldyq mereke syılaǵany týraly jazǵan edik.