Jambyl oblysynda pedofıl áke ómir boıyna bas bostandyǵynan aıyryldy

ASTANA. KAZINFORM – Qylmystyq ister jónindegi mamandandyrylǵan aýdanaralyq soty óz qyzyna zorlyq kórsetti dep aıyptalǵan er adamǵa qatysty úkim shyǵardy, dep habarlaıdy Kazinform tilshisi.

Osy jyldyń sáýir aıynda Qordaı aýylynda sottalýshy mas kúıinde 2019 jyly týǵan qyzyna qatysty seksýaldyq sıpattaǵy zorlyq-zombylyq áreketter jasaǵan.

Oǵan QR Qylmystyq kodeksi 121-babynyń 4-bóligi boıynsha ómir boıyna bas bostandyǵynan aıyrý túrindegi jaza taǵaıyndaýdy qarastyratyn aıyp taǵylǵan. Memlekettik aıyptaýshy naqty osy jazany qoldanýdy surady.

Sottalýshy óz kinásin moıyndady, biraq otbasy ony keshirmedi. Zardap shekken tarap zań boıynsha jazalaýdy talap etti.

Jeńildetetin mán-jaılarǵa qaramastan, sot ony ómir boıyna bas bostandyǵynan aıyrý jazasyna kesti. Budan basqa, sottalǵan azamatqa 5 mln teńge kóleminde moraldyq shyǵyndy óteý mindetteldi.

Buǵan deıin respýblıkalyq psıhıkalyq densaýlyq ǵylymı-praktıkalyq ortalyǵy pedofılderge ómir boıyna bas bostandyǵynan aıyrý jazasyn engizýdi usynǵanyn jazǵan bolatynbyz.