Jambyl oblysynda páterdi sapasyz jóndegen merdigerden 3,9 mln teńge óndirildi
ASTANA. KAZINFORM — Merdiger páterdi jóndeýge alǵan 4,7 mln teńgeniń basym bóligin qaıtarýǵa mindetteldi.
Jambyl oblysynyń Moıynqum aýdandyq soty azamatsha M.-niń jeke kásipkerge qatysty qurylys merdigerlik shartyn buzý jáne aqsha qarajatyn óndirip alý týraly talap qoıýy boıynsha azamattyq isti qarady.
2025 jyldyń qazan aıynda taraptar arasynda Almaty qalasyndaǵy páterde jóndeý jumystaryn júrgizýge shart jasaldy. Shart boıynsha jóndeý quny 6,2 mln teńge bolǵan.
Talap qoıýshy jumystyń alǵashqy úsh kezeńi úshin jaýapkerge 4,7 mln teńge tóledi. Alaıda jóndeý jumystary tolyq oryndalmady, al jumystar men paıdalanylǵan materıaldardyń sapasy shart talaptaryna sáıkes kelmedi.
Azamatsha birneshe ret kemshilikterdi joıýdy talap etken, biraq bul nátıje bermedi. Keıinnen merdigerdiń páterge kirýine toqtaý qoıylyp, sharttyq qatynastar is júzinde toqtatyldy.
Jaýapker talap qoıýdy moıyndamaı, jumystyń bir bóligi oryndalǵanyn jáne páterge kirý múmkindiginiń bolmaýyna baılanysty jóndeýdi aıaqtaý múmkin emestigin kórsetti.
Saraptama qorytyndysyna sáıkes naqty oryndalǵan jumystar men materıaldardyń quny 1,4 mln teńgeni qurady. Bul rette páterdiń barlyq úı-jaılarynda plıtkalardy bólshekteý jáne ony tolyq aýystyrý quny 760 myń teńge mólsherinde aıqyndalǵan.
— Sot merdigerdiń shart talaptaryn eleýli túrde buzǵany, sonyń saldarynan talap qoıýshy shart jasasý kezinde kútken nátıjesinen aıyrylǵany týraly qorytyndyǵa keldi. Sot sheshimimen kelisimshart buzyldy. Jaýapkerden talap qoıýshynyń paıdasyna 3,9 mln teńge, notarıattyq jáne ókildik shyǵystar, sondaı-aq saraptama júrgizýge jalpy 385 myń teńge kóleminde shyǵystar óndirildi. Sheshim zańdy kúshine engen joq, — delingen Moıynqum aýdandyq sotynyń habarlamasynda.
Osyǵan deıin BQO turǵyny jaǵymsyz ısi bar jıhaz úshin satýshydan 2,6 mln teńge óndirip alǵanyn jazdyq.
