Ózin jemqorlyqpen kúres qyzmetiniń basshysy retinde tanystyrǵan adam ustaldy

ASTANA. KAZINFORM – Ózin sybaılas jemqorlyqqa qarsy qyzmettiń tóraǵasy retinde tanystyrǵan azamat ákimshilik jaýapkershilikke tartyldy, dep habarlaıdy QR Sybaılas jemqorlyqqa qarsy is-qımyl agenttiginiń baspasóz qyzmeti.

Agentiktiń Jambyl oblysy boıynsha departamenti Jýaly aýdanynyń №4 mektebiniń dırektory J.E. Pernesheva men Sybaılas jemqorlyqqa qarsy qyzmettiń tóraǵasy bolyp kóringen belgisiz adam arasyndaǵy telefon arqyly sóılesý faktisi boıynsha kelesini habarlaıdy.

Departament júrgizgen tekserý sheńberinde Atyraý oblysynyń aýmaǵynda turatyn azamattyń (az. «S») kim ekenin anyqtady.

Ol ózin sybaılas jemqorlyqqa qarsy qyzmettiń tóraǵasy retinde kórsete otyryp, buryn eńbek tártibin buzǵany (jumys ornynda mas kúıinde bolǵan) úshin jumystan bosatylǵan qyzmetkerdi jumysqa qaıta alýǵa járdem kórsetýdi suraǵan.

Osyǵan baılanysty azamat «S»-nyń is-áreketinde ákimshilik quqyq buzýshylyq belgileri baıqaldy, jınalǵan materıaldar quzyreti boıynsha Atyraý oblysynyń Polıtsııa departamentine quqyqtyq baǵa berý úshin jiberildi.

Bıylǵy 8 mamyrda Polıtsııa departamenti azamat «S»-ǵa qatysty jala jabý faktisi boıynsha Ákimshilik quqyq buzýshylyq týraly hattama (QR ÁQBtK 73-3-baby 2-bóligi) jasalyp, Atyraý qalalyq ákimshilik quqyq buzýshylyq jónindegi mamandandyrylǵan sotyna jiberildi.

Sot protsesi barysynda «S» kinásin tolyq moıyndady jáne jasaǵan isine ókinish bildirdi.

Bıylǵy 14 mamyrda sot sheshimimen «S» QR ÁQBtK-niń 73-3-baby 2-bóligi boıynsha kináli dep tanyldy jáne aıyppul túrinde ákimshilik jaýapkershilikke tartyldy.

- Azamattardan osyndaı alaıaqtyq qońyraýlarǵa senbeýge jáne qońyraýlar nemese habarlamalar kelip túsken jaǵdaıda Qazaqstan Respýblıkasynyń Quqyq qorǵaý organdaryna dereý habarlaýdy suraımyz, - delingen habarlamada.

Osyǵan deıin Antıkordyń qurylysy uzaqqa sozylǵan jobalardy baqylaýǵa alǵany týraly jazdyq.