Jambyl oblysynda óz egesin 30 mln shyǵynǵa ushyratqan qoıshy ustaldy
ASTANA. KAZINFORM — Jambyl oblysynyń Merki aýdanynda sharýa qojalyǵynyń ıesi malǵa túgendeý júrgizý kezinde 250 usaq malynyń joǵalǵanyn anyqtap, polıtsııaǵa júgingen.
Oblystyq Polıtsııa departamentiniń baspasóz qyzmetiniń málimetinshe, atalǵan derekke qatysty QR QK-niń «asa iri mólsherde adamdar tobymen aldyn ala sóz baılasý arqyly jasaǵan mal urlyǵy» babymen sotqa deıingi tergep-tekserý amaldary bastaldy.
Polıtsııa qyzmetkerleri jedel-izdestirý is-sharalary barysynda urlanǵan maldyń bir bóligin T.Rysqulov aýdanynan anyqtady. Tabylǵan maldar taný rásiminen keıin zańdy ıesine qaıtaryldy.
Tergeý barysynda sharýa qojalyqta mal baqqan qoıshynyń ózge de adamdarmen aldyn ala sóz baılasyp, maldardy jasyryn jymqyrýǵa qatysy bar ekeni belgili boldy.
Sonymen qatar, urlanǵan maldyń bir bóligi keıinnen basqa adamdarǵa 800 myń teńgege satylǵany anyqtaldy.
— Qylmystyq is boıynsha úsh kúdikti ustalyp, sot sanktsııasymen eki aı merzimge qamaýǵa alyndy. Qazirgi ýaqytta qylmystyq istiń barlyq mán-jaıyn anyqtaýǵa baǵyttalǵan tergeý amaldary júrgizilip jatyr, — deıdi tártip saqshylary.
Buǵan deıin Jambylda burynǵy qoıshy 72 maldy urlady degen kúdikpen ustalǵanyn jazǵanbyz.
