Jambyl oblysynda ótken jyly 6 tonnaǵa jýyq esirtki tárkilendi
Byltyr Jambyl oblysynda 6 tonnaǵa jýyq esirtki tárkilendi. Kazinform bul týraly Polisia.kz-ke silteme jasap habarlaıdy.
Jasyryn esirtki zerthanasy, qarasorany órteý, birneshe tonna tárkilengen esirtki zaty, ustalǵan esirtki satýshylar men saqtaýshylar – ótken jyly atqarylǵan jumys qorytyndysy.
Esirtki bıznesine qarsy kúres forposttarynyń biri sanalatyn Jambyl oblysynda esirtki qylmystaryn anyqtaý jumystary toqtaýsyz jáne jan-jaqty júrgiziledi. 2023-2025 jyldarǵa arnalǵan keshendi jospardy iske asyrý sheńberinde memlekettik organdarmen birlesken jumys jandandy. 2023 jyldyń 12 aıynda esirtki qylmysynyń 576 deregi anyqtaldy. Zańsyz aınalymnan 5 tonna 818 keli esirtki alyndy. Ótken jyly jambyldyq esirtki qylmysyna qarsy bólinis qyzmetkerleri qylmystyq toptyń múshelerin ustaý boıynsha birqatar iri arnaıy operatsııa júrgizdi. Arnaıy qyzmettermen birlese otyryp, Shymkent qalasy men Almaty oblysyna «geroındi» jetkizý arnasynyń joly kesildi.
– UQKD-men birlesip, Baızaq aýdanynda esirtki zerthanasy joıyldy, jasyryn bıznesti uıymdastyrǵan 5 adam ustaldy. Esirtki óndirý sıntetıkalyq esirtki óndirisiniń ónerkásiptik aýqymyna laıyqty eseptelgen. Polıtseıler 34 keliden astam sıntetıka jáne 4 tonna prekýrsorlar tárkiledi. Arnaıy is-sharalar nátıjesinde esirtki tutynýshylarǵa jetkiziletin 6 mıllıonnan astam doza joıyldy. Olardyń qylmystyq áreketteriniń aýqymy túsinikti bolý úshin sıntetıkalyq esirtkiniń asa iri mólsheri bir gramnan bastalatynyn aıta ketken jón, - dedi PD Esirtki qylmysyna qarsy is-qımyl basqarmasynyń bastyǵy Álim Bajyqbaev.
Búgingi tańda esirtki naryǵynyń qurylymy sıntetıkaǵa qaraı aýysty. Ótken jyly sıntetıkalyq esirtkini saqtaǵany jáne satqany úshin 20 adam ustaldy, zańsyz aınalymnan 1 keliden astam sıntetıkalyq esirtki quraly tárkilendi. Oblys ortalyǵynda quramy 4 adamnan turatyn qylmystyq top quryqtaldy. Solardyń biri Telegram paraqshasynda 5 myń jazylýshysy bar operator sıntetıkalyq esirtkini taratý úshin adamdardy jaldap, Atyraý jáne Almaty qalalaryna sıntetıkalyq esirtkini ótkizý arnasyn uıymdastyrǵan. Jedel qyzmetkerler 608 gramm mefedron esirtkisin tárkiledi.
Jartyjyldyq arnaıy is-sharalardyń qorytyndysy boıynsha geroın tobyna jatatyn esirtkilerdi satýdyń iri arnasy joıyldy. Buryn osyndaı áreketteri úshin sotty bolǵan 63 jastaǵy zeınetker áıel ustaldy. Travmodol medıtsınalyq preparatynyń jıyntyq kestesine engizilgennen keıin túzeý mekemelerine dárihanalyq esirtki zattaryn jetkizýge qatysty aqparatty tekserý boıynsha birqatar jedel-izdestirý is-sharalary júrgizildi. Osyǵan baılanysty Baızaq aýdanynyń turǵyny ustaldy, onyń úıin tintý barysynda 3 430 dana travmadol, 90 dana samnol jáne 138 dana tropıkamed tabylyp, tárkilendi, bul preparattar qylmystyq-atqarý júıesi departamentiniń mekemelerinde satýǵa arnalǵan.
Aımaqta qarasora esirtkisi ósetin atyshýly Shý alqaby ornalasqan. Jyl saıyn «Qarasora-2023» respýblıkalyq jedel-aldyn alý is-sharasy ótkiziledi. Ótken jyly is- sharaǵa 120-dan astam qyzmetker jumyldyryldy, QR Ulttyq Ulanynyń «Búrkit» áskerı qyzmetshileriniń kúsh-quraldary jáne QR Qorǵanys mınıstrliginiń ushqyshsyz ushý apparattary tartyldy. «Qarasora» is-sharasynyń qorytyndysy: Shý alqabynan 1 tonna 293 keliden astam esirtki tárkilendi, osyǵan qatysty basqa oblystarǵa ony tasymaldap áketý boıynsha jabaıy qarasorany shabý jáne daıyndaý kezinde 15 adam ustaldy. Sondaı-aq qarasora ósirýdiń 20 deregi anyqtaldy, 1 800 keliden astam qarasora tárkilendi.
Qarasora tajalyn jeńý úshin jambyldyq polıtseıler barlyq qolda bar resýrstar men múmkindikterdi paıdalanýda. Jerdi jyrtý, Shýdyń shóbin shalǵymen shabý jáne órteý arqyly 220 tonnadan astam jabaıy qarasora joıyldy. Bıyl oblysta prokýratýra organymen birlesip, «Narko Shekteu Taraz» Telegram-boty iske qosyldy. Ol arqyly táýlik boıy turǵyndar túrli esirtki qylmystary týraly habarlaı alady, al osyǵan qatysty quqyq qorǵaý organdary jedel áreket etip, sharalar qoldana alady.
Qazirgi ýaqytta 1 579 ótinish-talap kelip tústi. 1 383 ınternet-saıt buǵattaldy, 392 esirtki jarnamalaǵan graffıtı jazýlar joıyldy.Esirtki qylmysyna qarsy is-qımyl basqarmasy jastarmen aldyn alý jáne senimdi qarym-qatynas ornatý baǵytynda jumystar jasaýda. 30 myńnan astam oqýshy men stýdentterdiń qatysýymen 900 profılaktıkalyq is-shara ótkizildi.
