Jambyl oblysynda OA-da teńdesi joq amınqyshqyldar óndiretin joba iske qosyldy
ASTANA. KAZINFORM - Jambyl oblysynyń Shý aýdanynda júgerini tereń óńdeýge baǵyttalǵan strategııalyq ınvestıtsııalyq joba júzege asyrylyp jatyr.
QR aýyl sharýashylyǵy mınıstrligi baspasóz qyzmetiniń habarlaýynsha,óndiristik keshen «Jibek Joly» arnaıy ekonomıkalyq aımaǵynda salynyp jatyr. Jobaǵa Shengtai Biotech Co., Ltd (Fufeng Group) kompanııasy qatysýda.
Bul joba Memleket basshysynyń óńdeýshi ónerkásipti damytý jónindegi tapsyrmalary aıasynda júzege asyrylyp, ónerkásiptik parkti kezeń-kezeńimen salýdy kózdeıdi. Qazirgi tańda kásiporynnyń alǵashqy kezeńi aıaqtaldy.
Zaýyt suranysqa ıe amınqyshqyldaryn, sonyń ishinde valın, treonın, glýtamın jáne tsıtrýllın óndirýge baǵyttalǵan.
Qazirgi ýaqytta synaq rejıminde alǵashqy ónim ızoleıtsın men leıtsın alyndy. Bul otandyq ónerkásip úshin asa mańyzdy oqıǵa. Óıtkeni tarmaqtalǵan tizbekti almastyrylmaıtyn amınqyshqyldardy óndirý Qazaqstanda jáne jalpy Ortalyq Azııa óńirinde alǵash ret ıgerildi.
Búgingi kúni mejeli maqsatqa jetý úshin óndiris kólemin kezeń-kezeńimen arttyrý jumystary júrgizilip jatyr.
Zaýyt tolyq iske qosylǵannan keıin jyl saıyn 3 mıllıon tonnaǵa deıin júgeri óńdelip, 1700 jańa jumys orny ashylady degen jospar bar.
- Jalpy ınvestıtsııa kólemi 1,5 mıllıard AQSh dollaryn quraıdy, kásiporyn aýmaǵy 400 gektardy qamtyǵan.
Óndirilgen ónimder Ortalyq Azııa, Eýropa, Amerıka jáne Afrıka elderine eksporttalatyn bolady, - delingen habarlamada.
Osyǵan deıin otandyq ǵalymdardyń ázirlemeleri negizinde jańa zaýyt iske qosylǵany týraly jazdyq.
