Jambyl oblysynda ormandy alqapqa 143 mıllıonnan astam aǵash otyrǵyzý josparlanǵan

ASTANA. KAZINFORM – Jambyl oblysynda 2023-2027 jyldar aralyǵynda 143 mıllıon túp aǵash otyrǵyzý josparlanyp otyr.

- Búginge deıin óńirde 9,475 mıllıon aǵash otyrǵyzyldy, – dedi óńirdegi jobalyq basqarý jáne tsıfrlandyrý ortalyǵynyń basshysy Gúlpara Táshenova.

Spıkerdiń aıtýynsha, orman qory aýmaǵynda aǵash otyrǵyzý kólemin arttyrýǵa baǵyttalǵan jobalar biryńǵaı aqparattyq júıede tirkelip, aımaqtaǵy 13 orman sharýashylyǵy boıynsha 27 joba bekitilgen.

«Bul júıede ár jobanyń jarǵysy, bastalý jáne aıaqtalý merzimi, negizgi kezeńderi men oryndalý barysy tolyq kórsetilip, jumystardyń ashyq júrgizilýine múmkindik jasalǵan», – dedi Gúlpara Tashenova.

Maqsat – orman kólemin 14,5 mıllıon gektarǵa deıin jetkizý. Bul ekologııalyq jaǵdaıdy jaqsartyp, klımattyq ózgeristerdiń aldyn alýǵa yqpal etedi.

Sonymen qatar, orman sharýashylyqtaryna túsindirý jumystary júrgizilip, jobalardy júzege asyrýǵa qajetti materıaldyq-tehnıkalyq resýrstardy jetkizý, kóshetterdi otyrǵyzý, kútip-baptaý sharalary qolǵa alynǵan.

«Biryńǵaı aqparattyq júıe arqyly jobalardy baqylaý óńirdegi orman ósirý jumystarynyń ashyqtyǵyn qamtamasyz etedi jáne halyqqa oryndalyp jatqan jumystar týraly tolyq aqparat usynady», – dedi ortalyq basshysy.

Aıta keteıik, Jambyl oblysynda sharýalardy sýmen qamtýǵa bólingen qarajat jymqyrylǵan.